കണ്ണൂര്‍ ജില്ലാ ആശുപത്രി സൂപ്പര്‍ സ്‌പെഷ്യാലിറ്റി ബ്ലോക്ക് ആഗസ്റ്റ് 11ന് മുഖ്യമന്ത്രി ഉദ്ഘാടനം ചെയ്യും

 

കണ്ണൂര്‍ ജില്ലയിലെ പൊതുജന ആരോഗ്യരംഗത്തെ ശ്രദ്ധേയമായ ചുവടുവെപ്പായി കണ്ണൂര്‍ ജില്ലാ ആശുപത്രി സൂപ്പര്‍ സ്‌പെഷ്യാലിറ്റി ബ്ലോക്ക് ആഗസ്റ്റ് 11ന് രാവിലെ 11 മണിക്ക് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ആരോഗ്യം, വനിത ശിശുവികസനം വകുപ്പ് മന്ത്രി വീണ ജോര്‍ജ് അധ്യക്ഷയാവും. നിയമസഭാ സ്പീക്കര്‍ അഡ്വ. എ എന്‍ ഷംസീര്‍ രജിസ്‌ട്രേഷന്‍, മ്യൂസിയം, പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളി എന്നിവര്‍ വിശിഷ്ടാതിഥികളാവും. ജില്ലാ പഞ്ചായത്ത് പ്രസിഡന്റ് അഡ്വ. കെ കെ രത്‌നകുമാരി സ്വാഗതം ആശംസിക്കുന്ന ചടങ്ങില്‍ ജില്ലാ ആശുപത്രി സൂപ്രണ്ട് ഡോ. ഷാജ് എം കെ റിപ്പോര്‍ട്ട് അവതരിപ്പിക്കും. എം പിമാരായ കെ സുധാകരന്‍, ഡോ. വി ശിവദാസന്‍, അഡ്വ. സന്തോഷ് കുമാര്‍, ജില്ലാ പഞ്ചായത്ത് വൈസ് പ്രസിഡന്റ് അഡ്വ. ബിനോയ് കുര്യന്‍, സ്ഥിരം സമിതി അധ്യക്ഷര്‍, ആരോഗ്യ വകുപ്പ് ഉദ്യോഗസ്ഥര്‍, രാഷ്ട്രീയ പാര്‍ട്ടി നേതാക്കള്‍ തുടങ്ങിയവര്‍ സംബന്ധിക്കും.

അഞ്ച് നിലകളുള്ള കെട്ടിടത്തില്‍ കാര്‍ഡിയോളജി, നെഫ്രോളജി, ഓങ്കോളജി ഒപികളുണ്ടെന്നും മൂന്ന് ഓപ്പറേഷന്‍ തിയറ്റര്‍, പോസ്റ്റ് ഓപറേറ്റീവ് വാര്‍ഡ്, മെഡിക്കല്‍ ഐ.സി.യുകള്‍, സര്‍ജിക്കല്‍ ഐ.സി.യുകള്‍, ഡയാലിസിസ് യൂണിറ്റ് എന്നിവയും വിവിധ നിലകളിലായി 23 എക്സിക്യൂട്ടീവ് പേ വാര്‍ഡുകളും പ്രവര്‍ത്തന സജ്ജമാണെന്നും ജില്ലാ പഞ്ചായത്ത് പ്രസിഡന്റ് അഡ്വ. കെ കെ രത്‌നകുമാരി ജില്ലാ ആശുപത്രിയില്‍ വാര്‍ത്താ സമ്മേളനത്തില്‍ അറിയിച്ചു.

‘ആര്‍ദ്രം’ മിഷനില്‍ ഉള്‍പ്പെടുത്തി കണ്ണൂര്‍ ജില്ലാ ആശുപത്രി വികസനത്തിന്റെ ഒന്നാം ഘട്ടത്തിലാണ് പുതിയ സൂപ്പര്‍ സ്പെഷ്യാലിറ്റി ബ്ലോക്കിന്റെ നിര്‍മ്മാണം ഉള്‍പ്പെടുത്തിയത്. 61.72 കോടി രൂപ കിഫ്ബി ഫണ്ട് ഉപയോഗിച്ച് അഞ്ച് നിലകളിലാണ് കെട്ടിടം നിര്‍മിച്ചിരിക്കുന്നത്. സിവില്‍ ജോലികള്‍ 39.8 കോടിക്കും ഇലക്ട്രിക്കല്‍ ജോലികള്‍ 21.9 കോടി രൂപയ്ക്കുമാണ് പൂര്‍ത്തീകരിച്ചത്. ബിഎസ്എന്‍എല്‍ ആണ് സ്പെഷല്‍ പര്‍പസ് വെഹിക്കിള്‍. പി ആന്‍ഡ് സി പ്രൊജക്ട്സ് ആണ് നിര്‍മ്മാണം നടത്തിയത്. ശുദ്ധജല ശേഖരണ സംവിധാനം, സീവേജ് ട്രീറ്റ്മെന്റ് പ്ലാന്റ്, ആന്തരിക റോഡുകള്‍, കോമ്പൗണ്ട് വാള്‍ എന്നിവയും നിര്‍മിച്ചു. രണ്ട് ലിഫ്റ്റുകള്‍ പുതുതായി പ്രവര്‍ത്തനമാരംഭിച്ചിട്ടുണ്ട്.

അഞ്ച് നിലകള്‍ക്കും 1254 ച.മീ വീതം വിസ്തീര്‍ണമുണ്ട്. ഏറ്റവും താഴത്തെ നിലയില്‍, സ്വീകരണ സ്ഥലം, വാഹന പാര്‍ക്കിംഗ്, 110 കെ. വി സബ്സ്റ്റേഷന്‍ എന്നിവയാണ് ഒരുക്കിയിരിക്കുന്നത്. ഒന്നാം നിലയില്‍ 150 പേരെ ഉള്‍ക്കൊള്ളാന്‍ കഴിയുന്ന കാത്തിരിപ്പ് ലോഞ്ചോടുകൂടിയ ഒന്‍പത് ഒ.പി കണ്‍സള്‍ട്ടേഷന്‍ റൂമുകള്‍, യു.പി.എസ് റൂം, ഫാര്‍മസി, ടോയ്ലറ്റുകള്‍ തുടങ്ങിയവ ഉള്‍പ്പെടുന്നു.

രണ്ടാം നിലയില്‍ മൂന്ന് മോഡുലാര്‍ ഓപറേഷന്‍ തിയറ്ററുകള്‍. ഇതില്‍ ഒ.ടി. സ്റ്റോര്‍, നഴ്സിംഗ് സ്റ്റേഷന്‍, ഡോക്ടറുടെ മുറി, പ്രീ-അനസ്തേഷ്യ റൂം എന്നിവയുണ്ടാവും. മെഡിക്കല്‍, സര്‍ജിക്കല്‍ ഐ.സി.യുകള്‍, കാത്തിരിപ്പ് സ്ഥലം, നഴ്സ് റൂം, അനസ്തേഷ്യ കണ്‍സള്‍ട്ടേഷന്‍ റൂം, ടോയ്ലറ്റുകള്‍ എന്നിവയുമുണ്ടാവും.

മൂന്നാം നിലയില്‍ 30 കിടക്കകള്‍ വീതമുള്ള ജനറല്‍ വാര്‍ഡ്, 22 മെഷീനുകളോടുകൂടിയ ഡയാലിസിസ് യൂണിറ്റ് എന്നിവയും കാത്തിരിപ്പ് കേന്ദ്രം, പോസ്റ്റ് ഡയാലിസിസ് റൂം, അഞ്ച് പേ വാര്‍ഡുകള്‍, പെരിറ്റോണിയല്‍ ഡയാലിസിസ് റൂം, സ്റ്റോര്‍ സംവിധാനങ്ങള്‍ എന്നിവയും ഉള്‍പ്പെടുന്നു. നാലാം നിലയില്‍ 30 കിടക്കകളുള്ള ജനറല്‍ വാര്‍ഡ്, നഴ്സിംഗ് സ്റ്റേഷന്‍, ടോയ്ലറ്റുകള്‍ എന്നിവ ഉള്‍പ്പെടുന്നു.

സൈറ്റ് വികസന പ്രവര്‍ത്തനങ്ങളുടെ ഭാഗമായി മലിനജല സംസ്‌കരണ പ്ലാന്റ്, എസ്.ടി.പി.യുമായി ബന്ധിപ്പിച്ച പുതിയ ഡ്രെയിനേജ് സിസ്റ്റം, മാന്‍ഹോളുകള്‍, പൈപ്പ്ലൈന്‍ ശൃംഖല, 1,30,000 ലിറ്ററിന്റെ ഓവര്‍ഹെഡ് ടാങ്ക്. അഗ്നിശമനം, ഗാര്‍ഹികം, മഴവെള്ള സംഭരണം എന്നിവയ്ക്കായി ഒന്‍പത് ലക്ഷം ലിറ്ററിന്റെ ഭൂഗര്‍ഭ സംപ്, ജീവനക്കാര്‍ക്കുള്ള പാര്‍ക്കിംഗ് സൗകര്യം, ഇന്റര്‍ലോക്ക് പാകിയ റോഡുകളും സ്ട്രെച്ചര്‍ പാതകളും, ആര്‍സിസി ഡ്രെയിനുകള്‍, എസ്.എസ് ബ്ലോക്കിനുള്ള കേന്ദ്രീകൃത മെഡിക്കല്‍ ഗ്യാസ് പൈപ്പിംഗ് സിസ്റ്റം (എം.ജി.പി.എസ്.) എന്നിവയും പൂര്‍ത്തീകരിച്ചു.

നിലവില്‍ പ്രവര്‍ത്തിച്ചു വരുന്ന സര്‍ജിക്കല്‍ ബ്ലോക്ക്, ട്രോമ കെയര്‍, അഡ്മിന്‍ ബ്ലോക്ക്, അമ്മയും കുഞ്ഞും പരിചരണ ബ്ലോക്ക് എന്നിവയ്ക്കുള്ള സബ് പാനലുകലും പ്രവര്‍ത്തന സജ്ജമാണ്. പ്രതിദിനം മൂവായിരത്തിലേറെ രോഗികളാണ് ജില്ലാ ആശുപത്രിയിലെ 16 ഒ പികളിലായി എത്തുന്നത്.

വിവിധ സ്പെഷ്യാലിറ്റി സേവനങ്ങള്‍ രോഗീ സൗഹൃദമാക്കുന്നതിന്റെ ഭാഗമായാണ് സൂപ്പര്‍ സ്പെഷ്യാലിറ്റി ബ്ലോക്ക് ഒരുക്കിയിരിക്കുന്നത്. ജനറല്‍ മെഡിസിന്‍, ജനറല്‍ സര്‍ജറി, ഓര്‍ത്തോ, ഗൈനക്, ഡെന്റല്‍, സൈക്യാട്രി, നെഫ്രോളജി, കാര്‍ഡിയോളജി, ചെസ്റ്റ്, ഇഎന്‍ടി, സ്‌കിന്‍, പീഡിയാട്രിക്, ഫിസിക്കല്‍ മെഡിസിന്‍ ആന്‍ഡ് റിഹാബിലിറ്റേഷന്‍ തുടങ്ങിയ ഒപികള്‍ക്കു പുറമേ കൗമാര ക്ലിനിക്, ജീവിതശൈലീ രോഗക്ലിനിക്, ട്രോമാകെയര്‍, ബ്ലഡ് ബാങ്ക് എന്നിവയും മികച്ച നിലയില്‍ പ്രവര്‍ത്തിക്കുന്നു.

വാര്‍ത്താസമ്മേളനത്തില്‍ ജില്ലാ പഞ്ചായത്ത് വൈസ് പ്രസിഡന്റ് അഡ്വ. ബിനോയ് കുര്യന്‍, പൊതുരാമത്ത് സ്ഥിരം സമിതി ചെയര്‍പേഴ്‌സണ്‍ അഡ്വ. ടി സരള, ജില്ലാ ആശുപത്രി സൂപ്രണ്ട് ഡോ. എം കെ ഷാജ്, ഡെപ്യൂട്ടി സൂപ്രണ്ട് ഡോ. ഗ്രിഫിന്‍ സുരേന്ദ്രന്‍, ഡോ. പി കെ അനില്‍കുമാര്‍, ആര്‍ എം ഒ ഡോ. സുമിന്‍ മോഹന്‍ തുടങ്ങിയവര്‍ സംബന്ധിച്ചു.