മോഹൻലാൽ–മീരാ ജാസ്മിൻ വീണ്ടും ഒന്നിക്കുന്നു; ‘അതിമനോഹരം’ റിലീസ് പ്രഖ്യാപിച്ചു

 

കൊച്ചി: ‘ദൃശ്യം 3’യുടെ വിജയത്തിന് പിന്നാലെ മോഹൻലാൽ ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമായ ‘അതിമനോഹരം’ റിലീസ് തീയതി പ്രഖ്യാപിച്ചു. 2026 ഡിസംബർ 24ന് ക്രിസ്മസ് റിലീസായാണ് ചിത്രം ലോകമെമ്പാടുമുള്ള തിയേറ്ററുകളിലെത്തുക.

റിലീസ് പ്രഖ്യാപനത്തോടൊപ്പം മീരാ ജാസ്മിനൊപ്പമുള്ള പുതിയ പോസ്റ്ററും മോഹൻലാൽ സമൂഹമാധ്യമങ്ങളിൽ പങ്കുവച്ചു. “His world begins and ends with the people he calls family” എന്ന കുറിപ്പോടെയായിരുന്നു പോസ്റ്റർ പുറത്തുവിട്ടത്. ഇതിനകം തന്നെ പോസ്റ്റർ ആരാധകർക്കിടയിൽ ശ്രദ്ധ നേടിയിട്ടുണ്ട്.

‘തുടരും’ എന്ന ചിത്രത്തിലൂടെ ശ്രദ്ധ നേടിയ തരുൺ മൂർത്തി സംവിധാനം ചെയ്യുന്ന ചിത്രത്തിൽ മോഹൻലാൽ ഒരു പോലീസ് ഓഫീസറുടെ വേഷത്തിലാണ് എത്തുന്നത്. രതീഷ് രവിയാണ് ചിത്രത്തിന്റെ തിരക്കഥ ഒരുക്കുന്നത്.

വർഷങ്ങൾക്കുശേഷം മോഹൻലാലിന്റെ നായികയായി മീരാ ജാസ്മിൻ വീണ്ടും എത്തുന്നു എന്നതും ചിത്രത്തിന്റെ പ്രധാന ആകർഷണമാണ്. നേരത്തെ ‘ഹൃദയപൂർവ്വം’ എന്ന ചിത്രത്തിൽ അതിഥി വേഷത്തിൽ ഇരുവരും ഒരുമിച്ചെത്തിയിരുന്നെങ്കിലും, മുഴുനീള നായിക-നായക കൂട്ടുകെട്ടായി വീണ്ടും എത്തുന്നത് ആരാധകരുടെ പ്രതീക്ഷ ഉയർത്തിയിരിക്കുകയാണ്.

ആദ്യം L365 എന്ന പേരിൽ പ്രഖ്യാപിച്ചിരുന്ന ഈ ചിത്രം പിന്നീട് സൃഷ്ടിപരമായ മാറ്റങ്ങൾക്ക് ശേഷം തരുൺ മൂർത്തിയുടെ സംവിധാനത്തിൽ പുതിയ രൂപത്തിൽ ഒരുങ്ങുകയായിരുന്നു. തുടക്കത്തിൽ പ്രഖ്യാപിച്ച കഥയിൽ നിന്ന് വ്യത്യസ്തമായ ചിത്രമായാണ് ‘അതിമനോഹരം’ ഇപ്പോൾ എത്തുന്നത്.

‘ദൃശ്യം 3’യുടെ വൻ വിജയത്തിന് ശേഷം എത്തുന്ന മോഹൻലാൽ ചിത്രമായതിനാൽ ‘അതിമനോഹരം’ ബോക്സ് ഓഫീസിലും വലിയ മുന്നേറ്റം നടത്തുമെന്നാണ് ആരാധകരുടെ പ്രതീക്ഷ. ക്രിസ്മസ് റിലീസ് പ്രഖ്യാപിച്ചതോടെ ചിത്രത്തെക്കുറിച്ചുള്ള ചർച്ചകളും സോഷ്യൽ മീഡിയയിൽ സജീവമായിട്ടുണ്ട്.