വേനൽ കാലത്തും മുടിയുടെ ഭംഗി കൂട്ടാൻ ഈ കാര്യങ്ങൾ ശ്രദ്ധിക്കണം..

ഓരോ കാലാവസ്ഥയിലും ചർമ്മത്തിനും മുടിക്കും വ്യത്യസ്തമായ പരിചരണമാണ് ആവശ്യമായി വരുന്നത്. പൊതുവെ വേനൽക്കാലം എല്ലാവർക്കും അത്ര താത്പര്യമുള്ള സമയമല്ല എന്നതാണ് യാഥാർത്ഥ്യം. മുടിയും ചർമ്മവുമൊക്കെ വെയിലേറ്റ് സ്വാഭാവിക ഭംഗി നഷ്ടപ്പെടാനുള്ള സാധ്യത ഈ സമയത്ത് വളരെ കൂടുതലാണ്. ക്യത്യമായ പരിചരണം ഉറപ്പാക്കിയില്ലെങ്കിൽ ഒരുപക്ഷെ മുടിയുടെയും ചർമ്മത്തിൻ്റെയുമൊക്കെ ആരോഗ്യത്തെ ദീർഘകാലത്തേക്ക് തന്നെ ഇത് ബാധിച്ചേക്കാം. വേനൽക്കാലത്ത് അവധി ആഘോഷിക്കുമ്പോൾ മുടിയുടെ സംരക്ഷണം ഉറപ്പാക്കേണ്ടതും വളരെ പ്രധാനമാണ്. അതികഠിനമായ ചൂടിലൂടെ ആണ് ഈ വേനൽക്കാലം കടന്ന് പോകുന്നത്. മുടിയിൽ സൂര്യൻ്റെ അൾട്രാവയലറ്റ് കിരണങ്ങൾ ഉണ്ടാക്കുന്ന ആഘാതങ്ങൾ ചെറുതല്ല. മുടികൊഴിച്ചിൽ , താരൻ , ഈർപ്പമില്ലായ്മ , വരണ്ട മുടി, മുടിയുടെ അറ്റം പിളരൽ , മുടി പൊട്ടൽ പോലെ നിരവധി പ്രശ്നങ്ങൾ പലരെയും ഈ കാലാവസ്ഥയിൽ അലട്ടുന്നുണ്ട്. മുടിയുടെ ഇത്തരം പ്രശ്നങ്ങളെ ഈ വേനൽക്കാലത്ത് എങ്ങനെ മറികടക്കാം എന്ന് നോക്കാം..

തലമുടി കഴുകാൻ ഏത് വെള്ളം ഉപയോഗിക്കണം?

ചൂട് കാലമായത് കൊണ്ട് തന്നെ പലർക്കും തണുത്ത വെള്ളത്തിൽ കുളിക്കാനായിരിക്കും താത്പര്യം. എന്നാൽ ദിവസവും ചൂട് വെള്ളത്തിൽ ശീലമുള്ള ചിലരെങ്കിലും ഉണ്ടാകും. പക്ഷെ ചൂട് വെള്ളം ഉപയോഗിച്ച് മുടി കഴുകുന്നത് അത്ര നല്ലതല്ല. മുടി ചൂട് വെള്ളത്തിൽ കഴുകാതിരിക്കാൻ പരമാവധി ശ്രമിക്കുക. കാരണം മുടി ചൂട് വെള്ളത്തിൽ കഴുകുന്നത് മുടിയിലെ ഈർപ്പത്തിനെ വലിച്ചെടുക്കാൻ കാരണമാകും. ഇതിലൂടെ മുടിയുടെ ക്യൂട്ടികൾ തുറക്കുകയും ചെയ്യുന്നു. വരണ്ട മുടിയുള്ളവരാണെങ്കിൽ വീണ്ടും ചൂട് വെള്ളത്തിൽ കുളിക്കുന്നത് അവരുടെ മുടിയെ കൂടുതൽ ഡ്രൈയാക്കും. ചൂട് വെള്ളത്തിന് പകരം തണുത്ത വെള്ളം ഉപയോഗിച്ച് മുടി കഴുകുന്നതായിരിക്കും കൂടുതൽ ഉചിതം.

ഷാംപൂ മുടിയ്ക്ക് നല്ലതാണോ?

അതികഠിനമായ ചൂട് കാരണം തലയോട്ടിയും മുടിയുമൊക്കെ വിയർക്കുന്നത് സ്വാഭാവികമാണ്. ചൂടും വിയർപ്പും കാരണം ഒരുപാട് തവണ കുളിക്കുന്ന സ്വാഭാവം പലർക്കും ഉണ്ടാകും. വേനൽ കാലത്ത് ശുചിത്വം ഉറപ്പാക്കാൻ പല തവണ കുളിക്കുമ്പോൾ ഉള്ള ഷാംപൂവിൻ്റെ ഉപയോഗം ഒഴിവാക്കുക. എപ്പോഴും ഷാംപൂ ഉപയോഗിക്കാതെ പകരം വെള്ളം മാത്രം ഉപയോഗിച്ച് മുടി കഴുകുന്നതായിരിക്കും കൂടുതൽ ഉത്തമം. അങ്ങനെ ചെയ്യുന്നത് വഴി മുടിയിൽ സ്വാഭാവികമായി അടങ്ങിയിരിക്കുന്ന എണ്ണകളും പ്രോട്ടീനുകളും നഷ്ടപെടുന്നത് ഒഴിവാക്കാനും മുടിയുടെ ഭംഗി നിലനിർത്താനും സാധിക്കുന്നു.

ഏത് തരം കണ്ടീഷണറാണ് വേനൽ കാലത്ത് നല്ലത്?

മുടിയിൽ കണ്ടീഷണറുകൾ ഉപയോ​ഗിക്കേണ്ടതിൻ്റെ ആവശ്യകത എല്ലാവ‍ർക്കുമറിയാവുന്നതാണ്. മുടിയുടെ ഭം​ഗി വ‍ർധിപ്പിക്കുന്നതിൽ കണ്ടീഷണറുകൾ വലിയൊരു പങ്ക് വഹിക്കുന്നുണ്ട്. പക്ഷെ വേനൽ കാലത്ത് മുടിയ്ക്ക് ആവശ്യം ലീവ് ഇൻ കണ്ടിഷൻറുകൾ (Leave in conditioner) ആണ്. മുടിയുടെ ഭംഗി നിലനിർത്തുന്നതിനോട് ഒപ്പം അന്തിരീക്ഷത്തിലെ പൊടിയിൽ നിന്നും അഴുക്കിൽ നിന്നും അതുപോലെ ചൂടിൽ നിന്നും ഒക്കെ സംരക്ഷിക്കാൻ ലീവ് ഇൻ കണ്ടീഷണറുകൾ വളരെയധികം സഹായിക്കും.

ചൂട് കാലത്ത് സ്റ്റൈലിങ് ചെയ്യുന്നത് കൊണ്ട് കുഴപ്പമുണ്ടോ?

മുടിയിൽ നല്ല സ്റ്റൈല്ലായി കിടക്കണമെന്ന് ആഗ്രഹിക്കാത്തവരായി ആരും കാണില്ല. ഇന്നത്തെ കാലത്ത് സ്റ്റൈലിങ് ഉത്പന്നങ്ങൾ പലരുടെയും ജീവിതത്തിൻറെ ഒരു ഭാഗമായി കഴിഞ്ഞിരിക്കുകയാണ്. മുടിയുടെ ഭംഗി കൂട്ടുന്നതിലും ഒരു വ്യക്തിയുടെ ആത്മവിശ്വാസം വർധിപ്പിക്കുന്നതിലും ഇത്തരം സ്റ്റൈലിങ് ടൂളുകളുടെ പങ്ക് ചെറുതല്ല. പക്ഷെ വേനൽ കാലത്ത് മുടിയിൽ അധികമായി ചൂടേൽപ്പിക്കുന്നത് പരമാവധി കുറയ്ക്കുന്നതാണ് നല്ലത്. അന്തരീക്ഷത്തിലെ ഉയ‍ർന്ന താപനിലയ്ക്ക് പുറമെ വീണ്ടും ഇത്തരം ചൂട് കൂടുതലുള്ള ഉപകരണങ്ങൾ ഉപയോഗിക്കുന്നത് മുടിയുടെ ആരോഗ്യത്തെ വീണ്ടും നശിപ്പിക്കും. അത്യാവശ്യത്തിന് മാത്രം ഇത്തരം സ്റ്റൈല്ലിങ്ങ് ഉപകരണങ്ങൾ ഉപയോഗിക്കുന്നതാണ് ഈ വേനൽ കാലത്ത് നല്ലത്.

ചൂട് കാലത്ത് കെമിക്കൽ ട്രീറ്റ്മെൻ്റുകൾ ചെയ്യുന്നത് ദോഷകരമാണോ?

ചൂടാണെങ്കിലും മുടി അതിവേ​ഗത്തിലാണ് ഈ കാലാവസ്ഥയിൽ വളരുന്നത്. തലയിലെ രക്തയോട്ടം കൂടുതലായത് കാരണം മുടി വളരാൻ സഹായകരമായ പോഷകങ്ങൾ (nutrients) മുടിയിലേക്ക് വേഗത്തിൽ എത്തുന്നതാണ് ഇതിൻ്റെ പ്രധാന കാരണം. അതുകൊണ്ട് തന്നെ മുടിയുടെ വളർച്ചയ്ക്ക് സഹായകരമാവുന്ന കാര്യങ്ങൾ വേണം ഈ കാലാവസ്ഥയിൽ ചെയ്യാൻ. ആഴ്ചയിൽ ഒരിക്കൽ എങ്കിലും തലയിൽ നന്നായി എണ്ണ തേച്ച് മസാജ് ചെയ്യുന്നത് വളരെ നല്ലതാണ്. മുടിയുടെ ആരോഗ്യവും സൗന്ദര്യവും വർധിപ്പിക്കാൻ ഇത് സഹായിക്കും. കെമിക്കൽ ട്രീട്മെന്റുകളും ഹെയർ കളറിങ്ങും വേനൽ കാലത്ത് മുടിയുടെ ആരോ​ഗ്യത്തെ ദോഷകരമായിട്ടായിരിക്കും ബാധിക്കുന്നത്. അതുകൊണ്ട് അത് ഒഴിവാക്കാൻ ശ്രമിക്കുക.

ആഹാര രീതിയിൽ എന്തൊക്കെ കാര്യങ്ങൾ ശ്രദ്ധിക്കണം?

മുടിയ്ക്ക് ച‍ർമ്മത്തിനും പുറമെ നിന്ന് നൽകുന്ന സംരക്ഷണം മാത്രമല്ല ആവശ്യം കഴിക്കുന്ന ഭക്ഷണത്തിലും ശ്രദ്ധിക്കേണ്ടത് ഏറെ പ്രധാനമാണ്. ഭക്ഷണ രീതികൾ എത്രത്തോളം നല്ലതാണോ അത്രയും മുടിയുടെ ആരോഗ്യവും ഭംഗിയും കൂടുമെന്നാണ് പറയപ്പെടുന്നത്. ചർമ്മത്തിനെയും മുടിയെയും കൂടുതൽ കാലം ചെറുപ്പമായി നിലനിർത്താൻ നല്ല പോഷകങ്ങൾ അടങ്ങിയ ഭക്ഷണം കഴിക്കാൻ ശ്രദ്ധിക്കണം. മധുര പലഹാരങ്ങൾ കഴിക്കുന്നത് പരമാവധി കുറയ്ക്കുക. ധാരാളം വെള്ളം കുടിക്കേണ്ടതും ഏറെ പ്രധാനമാണ്. മുടിയുടെ വളർച്ചയിൽ പ്രോട്ടീന് വലിയൊരു പങ്കുണ്ട്. ഡയറ്റിൽ ധാരാളം പ്രോട്ടീൻ അടങ്ങിയ വിഭവങ്ങൾ ഉൾപ്പെടുത്താൻ ശ്രദ്ധിക്കുക. മുടിയ്ക്ക് ഏറെ ആവശ്യമായ ബയോട്ടിനും മറ്റു വൈറ്റമിനുകളും അടങ്ങിയ ഭക്ഷണങ്ങളും കഴിക്കണം. നിങ്ങൾക്ക് ആവശ്യമായ ഭക്ഷണം ഏതൊക്കെ ആണെന് തിരിച്ചറിയാൻ ഒരു നുട്രീഷനിസ്റ്റിന്റെ (Nutritionist) സഹായം തേടുന്നത് ഉചിതമായിരിക്കും.