കല്‍പ്പറ്റ: കല്‍പ്പറ്റ നഗരസഭ നടപ്പിലാക്കുന്ന സമഗ്ര ജിഐഎസ് മാപ്പിംഗ് പദ്ധതിയുടെ ഭാഗമായുള്ള ഡ്രോണ്‍ സര്‍വ്വേക്ക് കല്‍പ്പറ്റയില്‍ തുടക്കമായി.പദ്ധതിയുടെ ഉല്‍ഘാടനം നഗരസഭ ചെയര്‍മാന്‍ അഡ്വ. ഐസക്ക് ടി.ജെ നിര്‍വ്വഹിച്ചു. നഗരസഭാ വൈസ് ചെയര്‍പേഴ്‌സണ്‍ സരോജിനി ഓടമ്പത്ത്, സ്റ്റാന്റിംഗ് കമ്മിറ്റി ചെയര്‍മാന്‍മാരായ അഡ്വ. എ.പി. മുസ്തഫ, ആയിഷ പള്ളിയാല്‍, രാജാറാണി, നഗരസഭ സെക്രട്ടറി അലി അഷ്ഹര്‍ , എഞ്ചിനീയര്‍ മുനവ്വര്‍ തുടങ്ങിയവര്‍ സംസാരിച്ചു. കൗണ്‍സിലര്‍മാരായ ജൈന ജോയി, റജുല കെ, പി.കുഞ്ഞുട്ടി , സാജിത മജീദ്, നഗരസഭാ ജീവനക്കാര്‍, യു എല്‍ സി സി പ്രതിനിധികള്‍, തുടങ്ങിയവര്‍ പങ്കെടുത്തു.
നൂതന സാങ്കേതിക വിദ്യകളായ ഡ്രോണ്‍, ഡിജിപിഎസ്, ജിപിഎസ്, പ്രത്യേകം രൂപപ്പെടുത്തിയ മൊബൈല്‍ ആപ്ലിക്കേഷന്‍ തുടങ്ങിയവയുടെ സഹായത്തോടെ നഗരസഭ പരിധിയിലെ മുഴുവന്‍ പൊതു, സ്വകാര്യ ആസ്തികളും അവയുടെ അടിസ്ഥാന വിവരങ്ങളോടു കൂടി മാപ്പ് ചെയ്യുകയും അവ വിശകലന സൗകര്യത്തോട് കൂടിയ വെബ് പോര്‍ട്ടലില്‍ അപ്ലോഡ് ചെയ്യുകയുംവഴി ആവശ്യമായ വിവരങ്ങള്‍ ആവശ്യമുള്ള രീതിയില്‍ ജീവനക്കാരുടെയും ജനപ്രതിനിധികളുടെയും വിരല്‍ത്തുമ്പില്‍ എത്തിക്കുകയാണ് പദ്ധതിയുടെ ലക്ഷ്യം.
കല്‍പ്പറ്റ നഗരസഭയുടെ ആകാശത്ത് രണ്ടുദിവസം ഡ്രോണ്‍ ഉണ്ടാകുമെന്നും ആരും ഇതുകൊണ്ട് ആശങ്കപ്പെടേണ്ടതില്ലെന്നും അധികൃതര്‍ അറിയിച്ചു. പദ്ധതിയുമായി മുഴുവന്‍ ജനങ്ങളും സഹകരിക്കണമെന്നും പദ്ധതിയുടെ ഭാഗമായുള്ള കെട്ടിട സര്‍വ്വേയുമായി പഞ്ചായത്ത് നിയോഗിക്കുന്ന ആളുകള്‍ സമീപിക്കുമ്പോള്‍ പൂര്‍ണവും സത്യസന്ധവും കൃത്യവുമായ വിവരങ്ങള്‍ നല്‍കണമെന്നും അധികൃതര്‍ അറിയിച്ചു.
ആധുനിക വിവര സാങ്കേതിക വിദ്യയുടെ സഹായത്താല്‍ നടപ്പിലാക്കുന്ന ഈ പദ്ധതി പ്രകാരം നഗരസഭ പരിധിയിലെ മുഴുവന്‍ കെട്ടിടങ്ങളും ഫോട്ടോ ഉള്‍പ്പടെയുള്ള സമ്പൂര്‍ണ്ണ വിവരങ്ങള്‍ ഉള്‍പ്പെടുത്തി മാപ് ചെയ്യുന്നതോടൊപ്പം റോഡ്, പാലം, കല്‍വെര്‍ട്, ഡ്രൈനേജ്, കനാല്‍, ലാന്‍ഡ്മാര്‍ക്, തണ്ണീര്‍ത്തടങ്ങള്‍, സൂക്ഷ്മതല ഭൂവിനിയോഗ മാപ്പുകള്‍ എന്നിവ ഒരു വെബ്‌പോര്‍ട്ടലില്‍ ആവശ്യാനുസരണം സേര്‍ച്ച് ചെയ്ത പരിശോധിക്കാന്‍ കഴിയും വിധമാണ് തയ്യാര്‍ ചെയ്യുന്നത്.
ആധുനികതയിലൂന്നിയ ആസൂത്രണം, കൃത്യതയാര്‍ന്ന പദ്ധതി വിഭാവന-നിര്‍വഹണം, ക്ഷേമപദ്ധതികള്‍ ഏറ്റവും അര്‍ഹരിലേക് എത്തിക്കുക, അടിസ്ഥാന സൗകര്യ വികസനം എന്നിവ ഏറ്റവും കൃത്യതയോടെ നടപ്പിലാക്കാന്‍ സഹായിക്കുന്നതോടൊപ്പം കൃഷി, വ്യവസായം, ആരോഗ്യം, ദുരന്തനിവാരണം തുടങ്ങിയ മേഖലകളിലെ പദ്ധതികള്‍ കാര്യക്ഷമമായി പ്രാവര്‍ത്തികമാക്കാനും സഹായിക്കുന്നുണ്ട്. നഗരസഭയുടെ സമഗ്ര വികസനം ശാസ്ത്രീയമായി സാധ്യമാക്കാന്‍ പദ്ധതി സഹായകമാകുമെന്നും കെ സ്മാര്‍ട്ട് ഉള്‍പ്പടെയുള്ള പദ്ധതികള്‍ക്ക് ഇത് ഏറെ പ്രയോജനപ്രദമാണെന്നും സത്യസന്ധമായ വിവരങ്ങള്‍ നല്‍കി മുഴുവന്‍ ആളുകളും ഇതുമായി പൂര്‍ണമായും സഹകരിക്കണമെന്നും നഗരസഭ അറിയിച്ചു.
പൊതുജനങ്ങളുടെ സഹകരണമാണ് ഏതൊരു പദ്ധതിയുടെയും വിജയത്തിന്റെ അടിസ്ഥാനമെന്നും വീടുതോറുമുള്ള വിവര ശേഖരണ സര്‍വ്വെയ്ക് ജനങ്ങളുടെ സഹകരണം ആവശ്യമാണെന്നും അധികൃതര്‍ പറഞ്ഞു. സത്യസന്ധവും പൂര്‍ണവുമായ വിവരങ്ങള്‍ നല്‍കുന്നതിലൂടെ ഈ പദ്ധതിയുടെ വിജയത്തിന്റെ അടിസ്ഥാന ശിലയായി മാറാന്‍ പൊതുജനത്തിന് സാധിക്കും. അതിനാല്‍ ഈ പദ്ധതിയുടെ ഭാഗമായുള്ള പ്രവര്‍ത്തനങ്ങള്‍ക് എല്ലാവരും സഹകരിക്കണമെന്ന് നഗരസഭ ആവശ്യപ്പെട്ടു.
.jpeg)
0 Comments