പേര് പറഞ്ഞില്ല; എസ്. ജയശങ്കർ പങ്കെടുത്ത വേദിയിൽ നിന്ന് ആർ. ശ്രീലേഖ ഇറങ്ങിപ്പോയി!

 

തിരുവനന്തപുരം വട്ടിയൂർക്കാവ് മണ്ഡലത്തിലെ എൻഡിഎ തെരഞ്ഞെടുപ്പ് പ്രചാരണ വേദിയിൽ നാടകീയ രംഗങ്ങളാണ് അരങ്ങേറിയത്. കേന്ദ്രമന്ത്രി എസ്. ജയശങ്കർ പങ്കെടുത്ത പരിപാടിയിൽ തന്റെ പേര് പരാമർശിക്കാത്തതിൽ പ്രതിഷേധിച്ച് വട്ടിയൂർക്കാവിലെ എൻഡിഎ സ്ഥാനാർത്ഥി ആർ. ശ്രീലേഖ വേദിയിൽ നിന്ന് ഇറങ്ങിപ്പോയി. വട്ടിയൂർക്കാവിലെ പരിപാടിയായിരുന്നിട്ടും സമീപ മണ്ഡലമായ നേമത്തെ സ്ഥാനാർത്ഥിയും ബിജെപി സംസ്ഥാന അധ്യക്ഷനുമായ രാജീവ് ചന്ദ്രശേഖരന്റെ പേര് മാത്രമാണ് കേന്ദ്രമന്ത്രി പ്രസംഗത്തിൽ പരാമർശിച്ചത്. ഇതാണ് ശ്രീലേഖയെ പ്രകോപിപ്പിച്ചത്.

വേദിയിൽ നിന്ന് ഇറങ്ങിപ്പോയ ശ്രീലേഖയെ അനുനയിപ്പിക്കാൻ മുതിർന്ന ബിജെപി നേതാക്കൾ രംഗത്തെത്തി. വേദിയിലുണ്ടായിരുന്ന രാജീവ് ചന്ദ്രശേഖരനോടും മേയർ വി.വി. രാജേഷിനോടും അവർ തന്റെ അതൃപ്തി പരസ്യമായി പ്രകടിപ്പിച്ചു. ഇതിനിടെ തന്നെ ശാന്തയാക്കാൻ ശ്രമിച്ച ബിജെപി സംസ്ഥാന ഉപാധ്യക്ഷൻ ജി. സോമനോട് ശ്രീലേഖ കയർത്തു സംസാരിക്കുകയും ചെയ്തു. സ്ഥാനാർത്ഥിയെന്ന നിലയിൽ തനിക്ക് ലഭിക്കേണ്ട പരിഗണന ലഭിച്ചില്ലെന്ന ഉറച്ച നിലപാടിലായിരുന്നു അവർ.

ഒടുവിൽ പാർട്ടി നേതാക്കളുടെ നിരന്തരമായ അനുനയ നീക്കങ്ങൾക്കൊടുവിലാണ് ശ്രീലേഖ വീണ്ടും വേദിയിലേക്ക് മടങ്ങിയെത്തിയത്. വട്ടിയൂർക്കാവ് മണ്ഡലത്തിൽ തെരഞ്ഞെടുപ്പ് പ്രചാരണം ചൂടുപിടിക്കുന്നതിനിടെ മുന്നണിക്കുള്ളിലുണ്ടായ ഈ അസ്വാരസ്യങ്ങൾ രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്.