വാഷിങ്ടണ്: 99ാമത് ഓസ്കാര് പുരസ്കാരങ്ങള്ക്ക് മുന്നോടിയായി അക്കാദമി ഓഫ് മോഷന് പിക്ചര് ആര്ട്സ് ആന്ഡ് സയന്സസ് സുപ്രധാനമായ നിയമഭേദഗതികള് പ്രഖ്യാപിച്ചു.ആഗോള സിനിമാരംഗത്തെ മാറ്റങ്ങള് ഉള്ക്കൊണ്ടുകൊണ്ട് അന്താരാഷ്ട്ര ചലച്ചിത്ര വിഭാഗത്തിലെ യോഗ്യതാ മാനദണ്ഡങ്ങള് പരിഷ്കരിക്കുകയും സിനിമാ നിര്മ്മാണത്തില് നിര്മ്മിത ബുദ്ധിയുടെ (എ.ഐ)കടന്നുകയറ്റത്തെക്കുറിച്ച് വ്യക്തമായ മാര്ഗ്ഗനിര്ദ്ദേശങ്ങള് പുറത്തിറക്കുകയുമാണ് അക്കാദമി ചെയ്തത്.
അന്താരാഷ്ട്ര ചലച്ചിത്ര വിഭാഗത്തില് ഏറെ വിമര്ശനങ്ങള് നേരിട്ടിരുന്ന യോഗ്യതാ മാനദണ്ഡങ്ങളില് ഇളവ് വരുത്തിയിട്ടുണ്ട്. ഇതിനുമുമ്പ് തിയേറ്റര് റിലീസിന് വലിയ പ്രാധാന്യമുണ്ടായിരുന്നെങ്കില്, ഇനി മുതല് കാന്, വെനീസ്, ടൊറന്റോ തുടങ്ങിയ ലോകപ്രശസ്തമായ ചലച്ചിത്രമേളകളില് നിന്ന് ഉന്നത ബഹുമതികള് നേടുന്ന ചിത്രങ്ങള്ക്ക് നേരിട്ട് മത്സരത്തിന് യോഗ്യത നേടാന് അവസരമൊരുങ്ങും.
ഇത് വിവിധ രാജ്യങ്ങളില് നിന്നുള്ള മികച്ച ചിത്രങ്ങള്ക്ക് ഓസ്കാര് വേദിയിലേക്ക് എത്താനുള്ള സാധ്യത വര്ദ്ധിപ്പിക്കുന്നു.സിനിമയില് സാങ്കേതിക വിദ്യകള് ഉപയോഗിക്കുന്നതിന് തടസ്സമില്ലെങ്കിലും, ക്രിയേറ്റീവ് രംഗങ്ങളില് മനുഷ്യന്റെ പങ്ക് തന്നെയാകണം പ്രധാനം എന്നതില് അക്കാദമി കര്ശനമായ നിലപാടാണ് സ്വീകരിച്ചിരിക്കുന്നത്.
തിരക്കഥകള് നിര്ബന്ധമായും മനുഷ്യര് തന്നെ എഴുതിയതായിരിക്കണം. എ.ഐ പൂര്ണ്ണമായി തയ്യാറാക്കുന്ന തിരക്കഥകള് മത്സരത്തിന് അര്ഹമല്ല. അതുപോലെ, മനുഷ്യര് സമ്മതത്തോടെ അഭിനയിച്ച പ്രകടനങ്ങള്ക്ക് മാത്രമേ പുരസ്കാരത്തിന് അര്ഹതയുണ്ടാവൂ. കൃത്രിമമായി സൃഷ്ടിച്ചെടുത്തതോ എ.ഐ ഉപയോഗിച്ച് മാറ്റം വരുത്തിയതോ ആയ അഭിനയമുറകള് പുരസ്കാരത്തിനായി പരിഗണിക്കില്ല. സമര്പ്പിക്കപ്പെടുന്ന സിനിമകളില് എ.ഐയുടെ ഉപയോഗം എത്രത്തോളമുണ്ടെന്ന് വ്യക്തമാക്കാനുള്ള ബാധ്യതയും അണിയറപ്രവര്ത്തകര്ക്കുണ്ട്.
ഇതിനൊപ്പം മറ്റ് ചില മാറ്റങ്ങളും അക്കാദമി പ്രഖ്യാപിച്ചിട്ടുണ്ട്. ഓസ്കാര് ട്രോഫിയില് ഇനിമുതല് സംവിധായകന്റെ പേര് ഔദ്യോഗികമായി ഉള്പ്പെടുത്തും. കൂടാതെ, ഒരേ വിഭാഗത്തില് ഒരു അഭിനേതാവിന് ഒന്നിലധികം ചിത്രങ്ങള്ക്ക് നാമനിര്ദ്ദേശം ലഭിക്കാന് ഇനി സാധിക്കും. കലാകാരന്മാരുടെ അധ്വാനത്തിന് ആദരവ് നല്കാനും, സാങ്കേതിക വിദ്യയുടെ വളര്ച്ചയ്ക്കിടയിലും മനുഷ്യസൃഷ്ടിയായ സിനിമയുടെ ആത്മാവ് നിലനിര്ത്താനുമാണ് അക്കാദമി ഈ തീരുമാനങ്ങള് എടുത്തിരിക്കുന്നത്.
0 Comments