ലങ്കയെ എറിഞ്ഞുവീഴ്ത്തി ഇന്ത്യൻ സ്പിന്നർമാർ; ഗാലെ ടെസ്റ്റിൽ ഒന്നാം ഇന്നിങ്‌സ് ലീഡ്

 

ഗാലെ: ശ്രീലങ്കക്കെതിരായ ഒന്നാം ക്രിക്കറ്റ് ടെസ്റ്റിൽ ഇന്ത്യക്ക് ലീഡ്. ഇന്ത്യ കുറിച്ച 462 റൺസ് പിന്തുടർന്ന ശ്രീലങ്ക 284ന് ഓൾഔട്ടായി. ഇതോടെ മൂന്നാം ദിനം സ്റ്റമ്പെടുക്കുമ്പോൾ ഇന്ത്യയ്ക്ക് 178 റൺസിന്റെ ലീഡായി. സൊനൽ ദിനുഷയുടെ(100) സെഞ്ച്വറിയാണ് വലിയ തകർച്ചയിൽ നിന്ന് ആതിഥേയരെ രക്ഷിച്ചത്. നിരോഷൻ ഡിക്‌വെല്ലെ അർധ സെഞ്ച്വറിയുമായി(80) മികച്ച പിന്തുണ നൽകി. ആറാം വിക്കറ്റിൽ ഇരുവരും ചേർന്ന് 146 റൺസ് കൂട്ടുകെട്ടാണ് പടുത്തുയർത്തിയത്. ഒരുവേള 90ന് അഞ്ച് എന്ന നിലയിൽ നിന്നാണ് ലങ്ക 284ലേക്ക് മുന്നേറിയത്. ഇന്ത്യക്കായി മാനവ് സുതാർ നാല് വിക്കറ്റും രവീന്ദ്ര ജഡേജ മൂന്ന് വിക്കറ്റും വീഴ്ത്തി. നേരത്തെ ദേവ്ദത്ത് പടിക്കലിന്റെ കന്നി ടെസ്റ്റ് സെഞ്ച്വറി കരുത്തിലാണ്(167) ഇന്ത്യ കൂറ്റൻ സ്‌കോർ പടുത്തുയർത്തിയത്. മൂന്നാം ദിനം ശ്രീലങ്കൻ ഇന്നിങ്‌സ് അവസാനിച്ച ഉടൻ മഴയും വെളിച്ചക്കുറവും മൂലം കളി നിർത്തിവെച്ചു.

ഇന്ന് ആദ്യ സെഷനിൽ തന്നെ മുഹമ്മദ് സിറാജും മാനവ് സുതാറും ചേർന്ന് ലങ്കയെ തകർച്ചയിലേക്ക് തള്ളിയിട്ടിരുന്നു. ഇന്നിങ്‌സിലെ രണ്ടാം പന്തിൽ തന്നെ ഓപ്പണർ നിഷാൻ ഫെർണാണ്ടോയുടെ (2) വിക്കറ്റ് ആതിഥേയർക്ക് നഷ്ടമായി. സിറാജിന്റെ പന്തിൽ ദേവ്ദത്ത് പടിക്കലിന് ക്യാച്ച് നൽകിയാണ് നിഷാൻ മടങ്ങിയത്. പിന്നീട് ക്രീസിലെത്തിയ ദിനേശ് ചാണ്ഡിമൽ (4) സുതാറിൻറെ പന്തിൽ വിക്കറ്റ് കീപ്പർ റിഷഭ് പന്തിന് ക്യാച്ച് നൽകി മടങ്ങി.

പിന്നാലെ ലാഹിരു ഉഡാരയേയും (27) പുറത്തായി. എക്‌സ്പീരിയൻസ് താരം കാമിന്ദു മെൻഡിസിനെ (14) ക്യാപ്റ്റൻ ശുഭ്മാൻ ഗിൽ ഡൈവിങ് ക്യാച്ചിലൂടെ മടക്കിയതോടെ ശ്രീലങ്ക ഫോളോഓൺ ഭീഷണി നേരിട്ടു. സ്‌കോർ 100 കടക്കും മുമ്പ് ധനഞ്ജയ ഡി സിൽവയെ (21) രവീന്ദ്ര ജഡേജയും മടക്കി. എന്നാൽ ആറാം വിക്കറ്റിൽ ദിനുഷ - ഡിക്ക്വെല്ല സഖ്യം ലങ്കയുടെ രക്ഷാപ്രവർത്തന ദൗത്യം ഏറ്റെടുക്കുകയായിരുന്നു. എന്നാൽ അവസാന സെഷനിൽ ഇന്ത്യൻ സ്പിന്നർമാർ അവസരത്തിനൊത്തുയർന്നതോടെ ഇന്ത്യക്ക് ഒന്നാംഇന്നിങ്‌സ് ലീഡിലേക്ക് മുന്നേറാനായി.