ജാവലിൻ ത്രോയിൽ ഇന്ത്യയ്ക്ക് ഇരട്ട മെഡൽ തിളക്കം; നീരജ് ചോപ്രയ്ക്ക് വെള്ളി, യശ്വീർ സിങ്ങിന് വെങ്കലം

ഗ്ലാസ്‌ഗോ: 2026 കോമൺവെൽത്ത് ഗെയിംസിൽ പുരുഷന്മാരുടെ ജാവലിൻ ത്രോയിൽ ഇന്ത്യയുടെ സൂപ്പർ താരം നീരജ് ചോപ്രയ്ക്ക് വെള്ളി മെഡൽ. 85.83 മീറ്റർ എറിഞ്ഞാണ് നീരജ് നേട്ടം കൈവരിച്ചത്. സീസണിലെ നീരജിൻ്റെ ഏറ്റവും മികച്ച പ്രകടനമാണിത്. മത്സരത്തിൽ ശ്രീലങ്കൻ താരം റുമേഷ് പതിരഗെ (89.75 മീറ്റർ) സ്വർണം നേടി.

ഇതേ മത്സരത്തിൽ ഇന്ത്യയുടെ യുവതാരം യശ്വീർ സിങ് വെങ്കല മെഡൽ കരസ്ഥമാക്കി. കരിയറിലെ ഏറ്റവും മികച്ച ദൂരമായ 85.41 മീറ്റർ എറിഞ്ഞാണ് യശ്വീർ മൂന്നാം സ്ഥാനം ഉറപ്പിച്ചത്. ഫൈനലിൽ പങ്കെടുത്ത മറ്റൊരു ഇന്ത്യൻ താരം രോഹിത് യാദവ് ഏഴാം സ്ഥാനത്താണ് ഫിനിഷ് ചെയ്തത്.

അതേസമയം, ജാവലിൻ ത്രോയിൽ നിലവിലെ ഒളിമ്പിക് സ്വർണ മെഡൽ ജേതാവായ പാകിസ്താന്റെ അർഷാദ് നദീം ആദ്യ മൂന്ന് റൗണ്ടുകൾക്ക് ശേഷം മത്സരത്തിൽനിന്ന് പുറത്തായി.