സ്വർണക്കൊള്ള അന്വേഷണം വളരെ നല്ല രീതിയിൽ നടക്കുന്നു: സജി ചെറിയാൻ

തിരുവനന്തപുരം: തന്ത്രി കണ്ഠര് രാജീവരെ അറസ്റ്റ് ചെയ്ത വിഷയത്തിൽ കൂടുതൽ ഒന്നും ഇപ്പോൾ പറയുന്നില്ലെന്ന് മന്ത്രി സജി ചെറിയാൻ‌‌‌‌‌‌‌‌‌‌‌.ഹെെക്കോടതിയുടെ നിരീക്ഷണത്തിൽ എസ്ഐടി നടത്തുന്ന ശബരിമല സ്വർണക്കൊള്ള അന്വേഷണം വളരെ നല്ല രീതിയിൽ നടക്കുന്നുണ്ടെന്നും സജി ചെറിയാൻ പറഞ്ഞു.

കേസ്‌ സംബന്ധിച്ച് കൂടുതൽ വിവരങ്ങൾ പുറത്തുവരട്ടെ. കോടതിയിൽ എന്താണ് അന്വേഷണ സംഘം സമർപ്പിച്ചിരിക്കുന്നത് എന്നതറിയട്ടെ, എന്നിട്ട് കൂടുതൽ പ്രതികരിക്കാം. അദ്ദേഹം തന്‍റെ നാട്ടുകാരനാണ്, എല്ലാവർക്കും വേണ്ടപ്പെട്ട ആളാണ്, അതെല്ലാം ശരിയാണെന്നും സജി ചെറിയാൻ പറഞ്ഞു.

അതേ സമയം, കണ്ഠര് രാജീവരെ അറസ്റ്റ് ചെയ്തതോടെ സ്വർണക്കൊള്ള സംബന്ധിച്ച നിർണായകമായ പല വിവരങ്ങളും പുറത്തുവരുമെന്നാണ് എസ്ഐടി കരുതുന്നത്. റിമാന്റിലായ തന്ത്രിയെ കസ്റ്റഡി അപേക്ഷ നൽകി തിങ്കളാഴ്ച കസ്റ്റഡിയിൽ വാങ്ങാനാണ് അന്വേഷണ സംഘം ശ്രമിക്കുന്നത്. അതിനായി കൊല്ലം വിജിലൻസ് കോടതിയിൽ കസ്റ്റഡി അപേക്ഷ അന്വേഷണ സംഘം നൽകും.