സംസ്ഥാനത്ത് മഴ കനക്കുന്നു; 8 ജില്ലകളിൽ റെഡ് അലേർട്ട്, മഞ്ചേശ്വരത്ത് റോഡ് ഒലിച്ചുപോയി

കാസർഗോഡ്: സംസ്ഥാനത്ത് ശക്തമായ മഴ തുടരുന്നു. മഞ്ചേശ്വരത്ത് കനത്ത മഴയിൽ റോഡ് ഒലിച്ചുപോയി. റോഡിൽ ഉണ്ടായിരുന്ന കാറും ബൈക്കും വെള്ളത്തിലായി. വാഹനങ്ങളെ പുറത്തെത്തിക്കാനുള്ള ശ്രമം തുടരുകയാണ്. സംസ്ഥാനത്തിന്റെ വിവിധ ഇടങ്ങളിൽ ശക്തമായ മഴ തുടരുകയാണ്.

അതേസമയം, അടുത്ത നാല് ദിവസം വരെ കേരളത്തിലെ ഒറ്റപ്പെട്ട സ്ഥലങ്ങളിൽ കനത്ത മഴയ്ക്ക് സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) അറിയിച്ചു. പത്തനംതിട്ട, കോട്ടയം, എറണാകുളം, ഇടുക്കി, കോഴിക്കോട്, വയനാട്, കണ്ണൂർ, കാസർഗോഡ് എന്നിവയുൾപ്പെടെ എട്ട് ജില്ലകളിൽ റെഡ് അലേർട്ട് ആണുള്ളത്. തിരുവനന്തപുരം, കൊല്ലം, ആലപ്പുഴ, തൃശൂർ, പാലക്കാട്, മലപ്പുറം എന്നീ ആറ് ജില്ലകളിൽ കാലാവസ്ഥാ വകുപ്പ് ഓറഞ്ച് അലേർട്ടും പ്രഖ്യാപിച്ചു.