നിസാന്റെ ​​ഗ്രാവിറ്റ് എത്തുന്നു; പുത്തൻ എംപിവി ജനുവരിയിൽ പ്രദർശിപ്പിക്കും

ജാപ്പനീസ് വാഹന നിർമാതാക്കളായ നിസാന്റെ പുത്തൻ എംപിവി അടുത്ത വർഷം ആദ്യം പ്രദർശിപ്പിക്കും. ​ഗ്രാവിറ്റ് എന്ന് പേരിട്ടിരിക്കുന്ന വാഹനം മാർച്ചിൽ ആയിരിക്കും വിപണിയിൽ എത്തുക. റെനോ ട്രൈബറിനെ പിന്തുണയ്ക്കുന്ന അതേ CMF-A+ പ്ലാറ്റ്‌ഫോമിനെ അടിസ്ഥാനമാക്കി, നിസ്സാൻ ഗ്രാവിറ്റ് എത്തുന്നത്. ഇന്ത്യയിലെ താരതമ്യേന വിരളമായ കോം‌പാക്റ്റ് എംപിവി ക്ലാസിലേക്കുള്ള ജാപ്പനീസ് ബ്രാൻഡിന്റെ ആദ്യ കടന്നുവരവാണിത്.

നിസ്സാൻ ഗ്രാവിറ്റിന് 6 ലക്ഷം മുതൽ 9 ലക്ഷം രൂപ വരെ (എക്സ്-ഷോറൂം, ഇന്ത്യ) വില പ്രതീക്ഷിക്കുന്നത്. റെനോ ട്രൈബർ തന്നെയാകും ​ഗ്രാവൈറ്റിന്റെ വിപണിയിലെ പ്രധാന എതിരാളി. മാ​ഗ്നെറ്റ്, എക്സ്ട്രാ ട്രെയിൻ എന്നിവയ്ക്ക് ശേഷം ഇന്ത്യൻ വിപണിയിൽ എത്തുന്ന മൂന്നാമത്തെ മോഡലാണിത്.

റെനോ ട്രൈബറിൽ ഉപയോഗിക്കുന്ന അതേ 1.0 ലിറ്റർ പെട്രോൾ എഞ്ചിൻ മാത്രമായിരിക്കും നിസ്സാൻ ഗ്രാവിറ്റിലും പ്രവർത്തിക്കുക. 72 എച്ച്പി കരുത്തും 96 എൻഎം ടോർക്കും ഉത്പാദിപ്പിക്കുന്നു. കൂടാതെ 5-സ്പീഡ് മാനുവൽ ഗിയർബോക്സ് അല്ലെങ്കിൽ 5-സ്പീഡ് എഎംടിയുമായി വരുന്നു. ഡീലർ-ഫിറ്റ് ഓപ്ഷനായി നിസ്സാൻ ഒരു സിഎൻജി പതിപ്പും വാഗ്ദാനം ചെയ്തേക്കാം. നിസ്സാൻ എംപിവിയുടെ ക്യാബിൻ ഇതുവരെ വെളിപ്പെടുത്തിയിട്ടില്ലെങ്കിലും, ലെയേർഡ് ഡാഷ്‌ബോർഡ് ഡിസൈനും 3-സ്‌പോക്ക് സ്റ്റിയറിംഗ് വീലും ഉള്ള ട്രൈബറിലേതിന് സമാനമായിരിക്കുമെന്നാണ് സൂചനകൾ.

നിസാൻ ഗ്രാവിറ്റിന്റെ സുരക്ഷാ സവിശേഷതകളിൽ EBD സഹിതമുള്ള ABS, ഇലക്ട്രോണിക് സ്റ്റെബിലിറ്റി പ്രോഗ്രാം, ടയർ-പ്രഷർ മോണിറ്ററിംഗ് സിസ്റ്റം, 6 എയർബാഗുകൾ എന്നിവ ഉൾപ്പെടും. ഹിൽ-സ്റ്റാർട്ട് അസിസ്റ്റ്, റിയർ പാർക്കിംഗ് സെൻസറുകൾ, ISOFIX ആങ്കറുകൾ, റിയർവ്യൂ ക്യാമറ, സ്പീഡ് സെൻസിംഗ് ഡോർ ലോക്കുകൾ, ഇംപാക്ട് സെൻസിംഗ് ഓട്ടോ അൺലോക്ക് എന്നിവയും ഇതിൽ ഉൾപ്പെടും. നിസാൻ ഗ്രാവിറ്റിന്റെ ഉയർന്ന വകഭേദങ്ങളിൽ ഫ്രണ്ട് പാർക്കിംഗ് സെൻസറുകളും ഉണ്ടായിരിക്കും.