തിരഞ്ഞെടുപ്പ് തീയതി ഉടൻ; മെയ് അഞ്ചിനകം വോട്ടെണ്ണൽ പൂർത്തിയാക്കാൻ കമ്മീഷൻ നീക്കം

കേരളം ഉൾപ്പെടെയുള്ള അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പ് തീയതികൾ നാളെയോ മറ്റന്നാളോ പ്രഖ്യാപിച്ചേക്കും. കേന്ദ്ര സർക്കാരുമായി ചേർന്ന് അർദ്ധസൈനിക സേനാ വിന്യാസം സംബന്ധിച്ച ചർച്ചകൾ തിരഞ്ഞെടുപ്പ് കമ്മീഷൻ ഇതിനോടകം പൂർത്തിയാക്കിയിട്ടുണ്ട്. മെയ് അഞ്ചിന് മുൻപായി വോട്ടെണ്ണൽ നടപടികൾ അവസാനിപ്പിക്കുന്ന വിധത്തിലുള്ള ഷെഡ്യൂളാണ് കമ്മീഷൻ തയ്യാറാക്കുന്നത്.

കേരളത്തിലെ വോട്ടെടുപ്പ് തീയതി നിശ്ചയിക്കുമ്പോൾ വിഷു ഉൾപ്പെടെയുള്ള ഉത്സവങ്ങൾ കണക്കിലെടുക്കുമെന്ന് കമ്മീഷൻ നേരത്തെ വ്യക്തമാക്കിയിരുന്നു. പശ്ചിമ ബംഗാളിൽ കഴിഞ്ഞ തവണ എട്ട് ഘട്ടങ്ങളിലായാണ് വോട്ടെടുപ്പ് നടന്നതെങ്കിലും, ഇത്തവണ അത് രണ്ടോ മൂന്നോ ഘട്ടങ്ങളായി കുറയ്ക്കണമെന്ന് രാഷ്ട്രീയ പാർട്ടികൾ ആവശ്യപ്പെട്ടിട്ടുണ്ട്. വരും ദിവസങ്ങളിൽ കൃത്യമായ സമയക്രമം പുറത്തുവരുന്നതോടെ സംസ്ഥാനങ്ങൾ തിരഞ്ഞെടുപ്പ് ചൂടിലേക്ക് പൂർണ്ണമായും കടക്കും.