ഇന്ത്യൻ വിമാനങ്ങളിൽ പകുതിയും തകരാറിൽ; വൻ സുരക്ഷാ വീഴ്ചകൾ ചൂണ്ടിക്കാട്ടി പാർലമെന്ററി സമിതി റിപ്പോർട്ട്

 

ന്യൂഡൽഹി: രാജ്യത്തെ വ്യോമയാന മേഖലയിലെ സുരക്ഷാ സംവിധാനങ്ങൾ അതീവ ഗുരുതരമായ പ്രതിസന്ധിയിലെന്ന് പാർലമെന്ററി സമിതി റിപ്പോർട്ട്. ഡി.ജി.സി.എ. (DGCA) നടത്തിയ ഓഡിറ്റിന്റെ അടിസ്ഥാനത്തിൽ സമർപ്പിച്ച റിപ്പോർട്ടിൽ, രാജ്യത്തെ പകുതിയോളം വിമാനങ്ങളിലും ആവർത്തിച്ചുള്ള സാങ്കേതിക തകരാറുകൾ കണ്ടെത്തിയതായി സമിതി ചൂണ്ടിക്കാട്ടി.

തകരാറുള്ള വിമാനങ്ങൾ: 2025 ജനുവരി മുതൽ 2026 ഫെബ്രുവരി വരെയുള്ള കാലയളവിൽ പരിശോധിച്ച 754 വിമാനങ്ങളിൽ 377 എണ്ണത്തിലും (ഏകദേശം 50%) ആവർത്തിച്ചുള്ള സാങ്കേതിക പ്രശ്നങ്ങളുണ്ട്. പരിശോധിച്ച വിമാനങ്ങളിൽ വലിയൊരു പങ്കും എയർ ഇന്ത്യയുടേതാണ്. എയർ ഇന്ത്യയുടെ 166 വിമാനങ്ങളിൽ 137 എണ്ണത്തിലും (82.5%) ഗുരുതരമായ സാങ്കേതിക തകരാറുകൾ കണ്ടെത്തി. കൂടാതെ, നൂറോളം സുരക്ഷാ ലംഘനങ്ങളും എയർ ഇന്ത്യയിൽ റിപ്പോർട്ട് ചെയ്തിട്ടുണ്ട്. എയർ ഇന്ത്യ എക്സ്‌പ്രസിന്റെ 101 വിമാനങ്ങളിൽ 54 എണ്ണത്തിലും സമാനമായ സാങ്കേതിക പ്രശ്നങ്ങൾ നിലനിൽക്കുന്നു.

ഓഡിറ്റിനിടെ കണ്ടെത്തിയ മൊത്തം തകരാറുകളിൽ പകുതിയോളം ഈ രണ്ട് എയർലൈനുകളിലുമാണെന്ന് സമിതി ഊന്നിപ്പറഞ്ഞു. അഹമ്മദാബാദ് വിമാനാപകടത്തിന് ശേഷം എയർ ഇന്ത്യയിൽ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) നടത്തിയ വിശദമായ ഓഡിറ്റും റിപ്പോർട്ടിൽ പരാമർശിച്ചിട്ടുണ്ട്. അടിയന്തര തിരുത്തൽ ആവശ്യമായ 100 ഓളം സുരക്ഷാ വീഴ്ചകൾ ഈ ഓഡിറ്റിൽ കണ്ടെത്തി.

സുരക്ഷാ ക്രമീകരണങ്ങളിൽ അടിയന്തരവും അടിസ്ഥാനപരവുമായ മാറ്റം വരുത്തണമെന്ന് സമിതി കർശന നിർദ്ദേശം നൽകി. യാത്രക്കാരുടെ ജീവന് ഭീഷണിയാകുന്ന ഇത്തരം വീഴ്ചകൾ ആവർത്തിക്കുന്നത് തടയാൻ കർശനമായ നടപടികൾ സ്വീകരിക്കണമെന്ന് പാർലമെന്ററി സമിതി കേന്ദ്ര സർക്കാരിനോട് ആവശ്യപ്പെട്ടു. ഈ ഗുരുതരമായ ആശങ്കകൾ പരിഹരിക്കുന്നതിനും യാത്രക്കാരുടെ സുരക്ഷയും പ്രവർത്തന വിശ്വാസ്യതയും ഉറപ്പാക്കുന്നതിനും ഇന്ത്യയുടെ വ്യോമയാന സുരക്ഷാ ഘടനയിൽ "അടിസ്ഥാനപരമായ പുനഃസജ്ജീകരണം" നടത്തണമെന്ന ആവശ്യം ഈ കണ്ടെത്തലുകൾ ഉയർത്തിയിട്ടുണ്ട്.