ന്യൂഡല്ഹി: നാഷണൽ ടെസ്റ്റിംഗ് ഏജൻസി (എന്ടിഎ) നടത്തുന്ന പരീക്ഷകളുടെ സുതാര്യത ഉറപ്പാക്കാൻ വൻ അഴിച്ചുപണിയുമായി കേന്ദ്ര വിദ്യാഭ്യാസ മന്ത്രാലയം. ചോദ്യപേപ്പർ ചോർച്ച തടയുന്നതിനായി നാല് ഘട്ടങ്ങളുള്ള പരിശോധനാ രീതി നടപ്പിലാക്കാനും 600 വിദഗ്ധരെ മാറ്റിയ ശേഷം പുതിയ വിദഗ്ധരെ ചുമതലപ്പെടുത്താനും തീരുമാനിച്ചു. എൻടിഎ ഓഫീസുകളുടെ സുരക്ഷ സിഐഎസ്എഫ് ഏറ്റെടുക്കും.
യുജിസി-നെറ്റ് പരീക്ഷകളിലെ വീഴ്ചകളും നീറ്റ്-യുജി ചോദ്യപേപ്പർ ചോർച്ചയെത്തുടർന്നുണ്ടായ പ്രതിഷേധങ്ങളെയും തുടർന്ന് കടുത്ത പ്രതിസന്ധിയിലായ വിദ്യാഭ്യാസ മന്ത്രാലയം, പരീക്ഷാ സംവിധാനം കുറ്റമറ്റതാക്കാനുള്ള തീവ്രശ്രമത്തിലാണ്. നീറ്റ് വിവാദത്തിന് പിന്നാലെ ധർമേന്ദ്ര പ്രധാൻ രാജിവെച്ചതിനെ തുടർന്ന് ചുമതലയേറ്റ പുതിയ കേന്ദ്ര വിദ്യാഭ്യാസ മന്ത്രി പ്രഹ്ലാദ് ജോഷിയുടെ അധ്യക്ഷതയിൽ തിങ്കളാഴ്ച ചേർന്ന അവലോകന യോഗത്തിലാണ് ഈ തീരുമാനങ്ങൾ എടുത്തത്.
ചോദ്യപേപ്പറുകളിൽ തെറ്റുകളോ വീഴ്ചകളോ കടന്നുകൂടുന്നത് തടയാനാണ് ചോദ്യങ്ങൾ നിർമ്മിക്കുന്നതിൽ നാല് ഘട്ടങ്ങളായുള്ള കശന പരിശോധനാ സംവിധാനം വരുന്നത്. പരീക്ഷാ ബോർഡിൽ നിന്ന് 600 വിദഗ്ധരെ ഒഴിവാക്കി പകരം പുതിയ വിദഗ്ധരെയാണ് നിയമിക്കുന്നത്. അടുത്ത 2-3 ആഴ്ചകൾക്കുള്ളിൽ 20 മുതൽ 25 വരെ പുതിയ ഉദ്യോഗസ്ഥരെ എൻടിഎയിൽ നിയമിക്കും. എൻടിഎ ഓഫീസുകൾ പുതിയ സമുച്ചയത്തിലേക്ക് മാറ്റും. ഇവിടെ സിഐഎസ്എഫ് കേന്ദ്ര സേനയെ ഉപയോഗിച്ച് സുരക്ഷ ശക്തമാക്കും.
പരീക്ഷകൾ സുതാര്യമായി നടത്തുന്നതിനാവശ്യമായ എല്ലാ നടപടികളും ഉറപ്പാക്കാൻ കേന്ദ്രമന്ത്രി പ്രഹ്ലാദ് ജോഷി നിർദേശം നൽകിയിട്ടുണ്ടെന്നാണ് റിപ്പോര്ട്ടുകള്. ഇതുവരെ സ്വീകരിച്ച നടപടികൾ സംബന്ധിച്ച് എൻ.ടി.എ ഡയറക്ടർ ജനറൽ അഭിഷേക് സിങ് മന്ത്രാലയത്തെ ധരിപ്പിച്ചിട്ടുണ്ട്.
0 Comments