തിരുവനന്തപുരം: വർക്കലയിൽ മഫ്തിയിലെത്തിയ എക്സൈസ് ഉദ്യോഗസ്ഥരെ കണ്ട് ഭയന്ന് കായലിൽ ചാടി യുവാവ്. ഇടവ ഗ്രാമപഞ്ചായത്തിലെ മങ്ങാട് കടവിൽ ഇന്നലെയാണ് സംഭവം. വർക്കല ഫയർഫോഴ്സ് ഉദ്യോഗസ്ഥർ സ്ഥലത്തെത്തി തിരച്ചിൽ തുടരുകയാണ്.
അഞ്ച് യുവാക്കൾ ഇന്നലെ രാവിലെ ഇവിടെയെത്തിയെന്നും ലഹരി ഉപയോഗിക്കുന്നതിനിടെ നാല് എക്സൈസ് ഉദ്യോഗസ്ഥർ കടന്നുവരികയുമായിരുന്നു. ഉദ്യോഗസ്ഥരെ കണ്ടപാടെ കൂടെയുള്ളവർ ചിതറിയോടുകയും ഒരാൾ കായലിൽ ചാടുകയും ചെയ്തു. മൂന്ന് പേർ രക്ഷപ്പെടുകയും ലഹരിയിലായിരുന്ന ഒരു യുവാവിനെ എക്സൈസ് കസ്റ്റഡിയിലെടുക്കുകയും ചെയ്തു. വെട്ടൂർ സ്വദേശി മുഹമ്മദിനെയാണ് കസ്റ്റഡിയിലെടുത്തതെന്ന് എക്സൈസ് അറിയിച്ചു.
സമീപത്തുണ്ടായിരുന്ന ബാഗിൽ നിന്ന് അഞ്ച് ഗ്രാം എംഡിഎംഎയും ചെറിയ തോതിൽ കഞ്ചാവും കണ്ടെത്തിയിട്ടുണ്ട്. ബാഗിൽ നിന്ന് ലഭിച്ച ഐഡി കാർഡ് അഡ്രസ് പ്രകാരം നെയ്യാറ്റിൻകര ചെങ്കൽസ്വദേശി അഭിജിത്തിന്റേതാണ് ബാഗ്. യുവാക്കൾ വന്ന കാർ റോഡിൽ തന്നെ കിടപ്പുണ്ട്. പൂന്തുറ സ്വദേശിയുടേതാണ് കാറെന്ന് പൊലീസ് പറഞ്ഞു. പ്രദേശത്ത് സാമൂഹ്യവിരുദ്ധരുടെ ശല്യം രൂക്ഷമാണെന്ന നാട്ടുകാരുടെ പരാതിയെ തുടർന്നാണ് എക്സൈസ് സംഘം സ്ഥലത്തെത്തി പരിശോധന നടത്തിയത്.
0 Comments