അറബ് പാർട്ടികളുടെ പിന്തുണ നിർണായകം; നെതന്യാഹുവിനും പ്രതിപക്ഷത്തിനും വ്യക്തമായ ഭൂരിപക്ഷമില്ല, ഇസ്രായേലിൽ രാഷ്ട്രീയ അനിശ്ചിതത്വം

തെൽ അവീവ്: ഇസ്രായേൽ തെരഞ്ഞെടുപ്പിൽ ആർക്കും ഭൂരിപക്ഷമില്ലാതെ വന്നതോടെ രാജ്യത്ത് രാഷ്ട്രീയ അനിശ്ചിതത്വം. ഇസ്രായേൽ പാർലമെന്റ് തെരഞ്ഞെടുപ്പിന്റെ പ്രാഥമിക റിപ്പോർട്ടുകൾ പ്രകാരം നിലവിലെ പ്രധാനമന്ത്രി ബെഞ്ചമിൻ നെതന്യാഹുവിന്റെ സഖ്യത്തിന് സർക്കാർ രൂപീകരിക്കാനുള്ള ഭൂരിപക്ഷമില്ല. പ്രതിപക്ഷത്തിനും വ്യക്തമായ ഭൂരിപക്ഷമില്ലാത്തതിനാൽ പുതിയ സർക്കാർ രൂപീകരണത്തിൽ മറ്റു പാർട്ടികളുടെ പിന്തുണ നിർണായകമായിരിക്കും. റിപ്പോർട്ട് ചെയ്യപ്പെട്ട സീറ്റ് നില പ്രകാരം നെതന്യാഹു സഖ്യത്തിന് 53 സീറ്റുകളും, ഗാഡി ഐസൻകോട്ട് സഖ്യത്തിന് 48 സീറ്റുകളും, അറബ് പാർട്ടികൾക്ക് 19 സീറ്റുകളുമാണ് ലഭിച്ചത്. 120 അംഗ പാർലമെന്റിൽ സർക്കാർ രൂപീകരിക്കാൻ കുറഞ്ഞത് 61 സീറ്റുകൾ ആവശ്യമാണ്.

നിലവിലുള്ള 120 അംഗ പാർലമെന്‍റിൽ സർക്കാർ രൂപീകരിക്കാൻ 61 സീറ്റുകൾ വേണമെന്നിരിക്കെ, ഇരു പ്രധാന മുന്നണികളും ഇതിൽ താഴെയാണ്. ഔദ്യോഗിക ഫലം നവംബർ നാലിന് മാത്രമേ പൂർണ്ണമായി സ്ഥിരീകരിക്കൂവെങ്കിലും, നിലവിലെ ട്രെൻഡുകൾ അനുസരിച്ച് ആർക്കും ഒറ്റയ്ക്ക് അധികാരം പിടിക്കാനാവാത്ത സങ്കീർണ്ണ സാഹചര്യമാണുള്ളതെന്നാണ് റിപ്പോർട്ടുകൾ. സാധാരണ രീതിയിൽ അറബ് വോട്ടർമാർ തെരഞ്ഞെടുപ്പുകളിൽ വലിയ തോതിൽ പങ്കെടുക്കാറില്ലായിരുന്നെങ്കിലും, നെതന്യാഹുവിനെ അധികാരത്തിൽ നിന്ന് താഴെയിറക്കുകയെന്ന ലക്ഷ്യത്തോടെ ഇത്തവണ പോളിങ് ശതമാനം വൻതോതിൽ ഉയരുകയായിരുന്നു.

തെരഞ്ഞെടുപ്പ് ഫലത്തിനെതിരെ രൂക്ഷ വിമർശനവുമായി നെതന്യാഹു രംഗത്തെത്തുകയും ചെയ്തിട്ടുണ്ട്. ഇസ്രായേൽ തെരഞ്ഞെടുപ്പ് അറബ് പാർട്ടികൾ മോഷ്ടിച്ചുവെന്നാണ് നെതന്യാഹുവിന്‍റെ ആരോപണം. അതേസമയം, പ്രതിപക്ഷ സഖ്യത്തിന്റെ നിലപാടാണ് തെരഞ്ഞെടുപ്പ് ഫലത്തിൽ ഇനി നിർണായകമാവുക. പ്രതിപക്ഷ നിരയിൽ ഡെമോക്രാറ്റ്സ് പാർട്ടി മാത്രമാണ് അറബികളുമായി സഖ്യത്തിന് തയ്യാറാണെന്ന് പരസ്യമായി വ്യക്തമാക്കിയിട്ടുള്ളത്. മറ്റ് ജൂത പാർട്ടികളെല്ലാം അറബ് പാർട്ടികളുമായി കൈകോർക്കുന്നതിനെ എതിർക്കുന്നവയാണെന്നാണ് വിവരം.

ഇസ്രായേലിലുടനീളം രാഷ്ട്രീയ അനിശ്ചിതാവസ്ഥ നിലനിൽക്കുമ്പോഴും, പ്രീപോൾ സർവേകളും എക്സിറ്റ് പോളുകളും പ്രവചിച്ചതുപോലുള്ള കനത്ത തിരിച്ചടി നെതന്യാഹുവിന് നേരിടേണ്ടിവന്നിട്ടില്ല. ഹമാസിനും ഹിസ്ബുല്ലയ്ക്കും ഇറാനുമെതിരെയുള്ള സൈനിക നീക്കങ്ങളിലൂടെ താനാണ് 'മിസ്റ്റർ സെക്യൂരിറ്റി' എന്ന പ്രതിഛായ ജനങ്ങളിലേക്കെത്തിക്കാൻ നെതന്യാഹുവിന് സാധിച്ചിട്ടുണ്ട്. ഇത് വോട്ടർമാരെ വലിയ തോതിൽ സ്വാധീനിച്ചിട്ടുണ്ടെന്നാണ് രാഷ്ട്രീയ വിദഗ്ധരുടെ വിലയിരുത്തൽ.