ദിവസങ്ങള്‍ക്ക് ശേഷം സ്വര്‍ണത്തിന് നേട്ടം; വിലയില്‍ വര്‍ധന

 

കൊച്ചി: ദിവസങ്ങള്‍ക്ക് ശേഷം കേരളത്തില്‍ സ്വര്‍ണവില ഉയര്‍ന്നു. ഗ്രാമിന് 45 രൂപയുടെ വര്‍ധനവാണ് ഇന്നുണ്ടായത്. 12,775 രൂപയായാണ് വില ഉയര്‍ന്നത്. പവന് 360 രൂപയുടെ വര്‍ധനയാണ് ഉണ്ടായത്. 1,02,200 രൂപയായാണ് പവന്‍ വില വര്‍ധിച്ചത്.

രാജ്യാന്തര വിപണിയില്‍ നേരിയ നേട്ടത്തോടെയാണ് സ്വര്‍ണം വ്യാപാരം നടത്തുന്നത്. 19 ഡോളറിന്റെ നേട്ടമാണ് സ്വര്‍ണത്തിന് ഉണ്ടായത്. ഔണ്‍സിന് 3,906.66 ഡോളറായാണ് സ്വര്‍ണവില ഉയര്‍ന്നത്.

പലിശനിരക്കുകള്‍ സ്വര്‍ണത്തിന് വെല്ലുവിളി

പലിശനിരക്കുകള്‍ ഉയരുമ്പോള്‍ സ്വര്‍ണത്തിന്റെ ആകര്‍ഷണം കുറയാറുണ്ട്. പലിശ ലഭിക്കാത്ത നിക്ഷേപമായതിനാല്‍ ഉയര്‍ന്ന പലിശനിരക്കുള്ള സാഹചര്യത്തില്‍ നിക്ഷേപകര്‍ മറ്റു ആസ്തികളിലേക്ക് മാറാനുള്ള സാധ്യത കൂടുതലാണ്.

യുഎസ് ഫെഡറല്‍ റിസര്‍വ് പലിശനിരക്കുകള്‍ കുറയ്ക്കുമെന്ന പ്രതീക്ഷയാണ് നേരത്തെ സ്വര്‍ണവിലയ്ക്ക് കരുത്തായത്. എന്നാല്‍ പണപ്പെരുപ്പ ആശങ്കകളും സാമ്പത്തിക സാഹചര്യങ്ങളിലെ മാറ്റങ്ങളും പലിശനിരക്കുകളെക്കുറിച്ചുള്ള പ്രതീക്ഷകളില്‍ മാറ്റം വരുത്തി. പലിശനിരക്കുകള്‍ ഉയര്‍ന്ന നിലയില്‍ തുടരുകയോ വീണ്ടും ഉയരുകയോ ചെയ്താല്‍ സ്വര്‍ണവിലയില്‍ കൂടുതല്‍ സമ്മര്‍ദമുണ്ടാകാം.