സമരസ്ഥലങ്ങൾ അനിശ്ചിതകാലത്തേക്ക് കയ്യേറി പ്രതിഷേധിക്കാൻ ആർക്കും അവകാശമില്ല: സുപ്രിംകോടതി

 

ന്യൂഡൽഹി: ഡൽഹിയിൽ തുടരുന്ന സമരങ്ങളുടെ പശ്ചാത്തലത്തിൽ സമരസ്ഥലങ്ങൾ അനിശ്ചിതകാലത്തേക്ക് കയ്യേറി പ്രതിഷേധിക്കാൻ ആർക്കും അവകാശമില്ലെന്ന് സുപ്രിംകോടതി. കേന്ദ്ര തെരഞ്ഞെടുപ്പ് കമ്മിഷനെതിരെ കഴിഞ്ഞ മാസം ജന്തർമന്തറിലും, രാംലീല മൈതാനിയിലും നടന്ന വൻ പ്രതിഷേധങ്ങൾക്കെതിരായ ഹരജികൾ പരിഗണിക്കവെയാണ് സുപ്രിംകോടതിയുടെ നിർണായക കണ്ടെത്തൽ.

ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചിന്റേതാണ് നിരീക്ഷണം. രാജ്യത്ത് എല്ലാവർക്കും പ്രതിഷേധിക്കാനുള്ള അവകാശമുണ്ടെങ്കിലും, അത് മറ്റുള്ളവരുടെ അവകാശങ്ങളെ ബാധിക്കുന്ന വിധത്തിലാകരുതെന്ന് കോടതി ഓർമ്മിപ്പിച്ചു. കിരാന കമ്മിറ്റി ഡൽഹി ഉൾപ്പെടെയുള്ള വ്യാപാരി സംഘടനകൾ കോടതിയെ സമീപിച്ചപ്പോഴാണ് നിർണായക നിരീക്ഷണം.

സമരങ്ങൾ കാരണം ഡൽഹിയിലെ കച്ചവടക്കാർക്ക് വലിയതോതിൽ ബിസിനസ് നഷ്ടം നേരിടുന്നുണ്ടെന്ന് വ്യാപാരി സംഘടനകൾക്കായി ഹാജരായ മുതിർന്ന അഭിഭാഷകൻ മുകുൾ റോത്തഗി കോടതിയിൽ വാദിച്ചു. ലക്ഷക്കണക്കിന് ആളുകൾ താമസിക്കുന്ന പ്രദേശങ്ങളിലെ കടകൾ അടഞ്ഞുകിടക്കുകയാണെന്നും വിൽപ്പനയെ സാരമായി ബാധിച്ചുവെന്നും അദ്ദേഹം ചൂണ്ടിക്കാട്ടി.

സമരങ്ങൾ നടക്കുമ്പോൾ തന്നെ ചെറിയ കച്ചവടക്കാരുടെയും വഴിയോര കച്ചവടക്കാരുടെയും ഉപജീവനത്തിനുള്ള അവകാശവും സംരക്ഷിക്കപ്പെടേണ്ടതുണ്ടെന്ന് കോടതി നിരീക്ഷിച്ചു. ചിലപ്പോൾ ഇത്തരം സമരങ്ങൾ വഴിയോര കച്ചവടക്കാർക്ക് ചെറിയ തോതിൽ സാമ്പത്തിക നേട്ടങ്ങൾ നൽകുന്ന ഒരു പ്രൊട്ടസ്റ്റ് ഇക്കോണമി സൃഷ്ടിക്കാറുണ്ടെന്നും കോടതി പരാമർശിച്ചു.

സമരത്തോടനുബന്ധിച്ച് ഗതാഗത തടസ്സങ്ങൾ, മെട്രോ സ്റ്റേഷനുകൾ അടച്ചിടൽ, ഇന്റർനെറ്റ് വിച്ഛേദിക്കൽ തുടങ്ങിയ ബുദ്ധിമുട്ടുകളും വലിയതോതിൽ ചർച്ചയായിരുന്നു. ഉത്സവ സീസണിലെ കച്ചവടത്തെ ഇത് പ്രതികൂലമായി ബാധിക്കുമെന്ന ആശങ്കയും വ്യാപാരികൾ പങ്കുവെച്ചു.