‘വാടക അക്കൗണ്ടുകൾ’ വഴി കോടികൾ കടത്തുന്നു; എടിഎം ഇടപാടുകളിൽ അതീവ നിരീക്ഷണം

കൊച്ചി: സൈബർ തട്ടിപ്പ് സംഘങ്ങൾ ‘വിലയ്ക്കുവാങ്ങിയ’ ബാങ്ക് അക്കൗണ്ടുകൾ വഴി വൻതോതിൽ പണം കൈമാറ്റം നടത്തുന്നത് വർധിച്ചതോടെ സംസ്ഥാനത്തെ എടിഎമ്മുകളിലെ സിസിടിവി നിരീക്ഷണം ശക്തമാക്കാൻ പോലീസ് തീരുമാനിച്ചു. അടുത്തിടെ നടന്ന കോടികളുടെ സാമ്പത്തികത്തട്ടിപ്പുകളിൽ തട്ടിപ്പുകാർ പണം കൈമാറിയത് മലയാളികളുടെ അക്കൗണ്ടുകൾ വഴിയാണെന്നും, ഇത് കേരളത്തിലെ വിവിധ എടിഎമ്മുകൾ വഴി പിൻവലിച്ചിട്ടുണ്ടെന്നും കണ്ടെത്തി. തട്ടിപ്പിലൂടെ ലഭിക്കുന്ന പണം കേരളത്തിലെ അക്കൗണ്ടുകളിൽ എത്തിച്ച ശേഷം, ഇന്ത്യക്കകത്തും പുറത്തുമുള്ള നിരവധി ബാങ്ക് അക്കൗണ്ടുകളിലേക്ക് കൈമാറ്റം ചെയ്യുന്നതായും അന്വേഷണത്തിൽ വ്യക്തമായി.

ഈ തട്ടിപ്പുകളുടെ വ്യാപ്തി ഞെട്ടിക്കുന്നതാണ്. അടുത്തിടെ കൊച്ചിയിലെ ഒരു ഫാർമ കമ്പനി ഉടമയ്ക്ക് 25 കോടി രൂപ നഷ്ടമായ സംഭവത്തിൽ, കൊല്ലം സ്വദേശിയുടെ ബാങ്ക് അക്കൗണ്ടിലേക്കാണ് പണമെത്തിയത്. ഈ തുക പാലാരിവട്ടത്തെ എടിഎമ്മിൽ നിന്നാണ് പിൻവലിച്ചിരുന്നത്. സമാനമായി, കണ്ണൂർ മട്ടന്നൂർ സ്വദേശിയായ ഡോക്ടർക്ക് 4.43 കോടി രൂപയിലധികം നഷ്ടമായ കേസിൽ പിടിയിലായ പെരുമ്പാവൂർ സ്വദേശി, കൂട്ടുപ്രതികളുമായി ചേർന്ന് ചെന്നൈ സ്വദേശിയെ കബളിപ്പിച്ച് അയാളുടെ ബാങ്ക് അക്കൗണ്ട് കൈക്കലാക്കിയാണ് തട്ടിപ്പ് നടത്തിയത്. ഇവർ തട്ടിപ്പ് പണം ആലുവ ഉൾപ്പെടെയുള്ള സ്ഥലങ്ങളിലെ എടിഎമ്മുകളിൽ നിന്ന് പിൻവലിക്കുകയായിരുന്നു.

പണം പോയ വഴി കണ്ടെത്തുമ്പോൾ മാത്രമാണ്, യഥാർഥ ബാങ്ക് അക്കൗണ്ട് ഉടമകൾക്ക് തട്ടിപ്പുമായി യാതൊരു ബന്ധവുമില്ലെന്ന് മനസ്സിലാകുന്നത്. ഈ പശ്ചാത്തലത്തിലാണ് എടിഎമ്മുകളിൽ നിന്ന് പണം പിൻവലിക്കുന്ന യഥാർഥ തട്ടിപ്പുകാരെ കണ്ടെത്താൻ ശ്രമം ശക്തമാക്കുന്നത്. സൈബർ കുറ്റകൃത്യങ്ങൾ ഫലപ്രദമായി പ്രതിരോധിക്കുന്നതിന്റെ ഭാഗമായി ബാങ്ക് ജീവനക്കാരുടെയും പോലീസിന്റെയും സംയുക്ത യോഗങ്ങൾ നടന്നുവരികയാണ്. കബളിപ്പിക്കപ്പെട്ട സാധാരണക്കാരുടെ പണം തിരിച്ചുപിടിക്കാൻ, എടിഎമ്മുകളിലെ നിരീക്ഷണം വഴി തട്ടിപ്പുകാരുടെ നീക്കങ്ങൾ തടയാൻ കഴിയുമെന്നാണ് പോലീസ് പ്രതീക്ഷിക്കുന്നത്.