മദ്യപിച്ച് വാഹനമോടിച്ച് അപകടം: സീരിയൽ താരം സിദ്ധാർത്ഥ് പ്രഭുവിനെതിരെ നടപടി കടുപ്പിച്ച് മോട്ടോർ വാഹന വകുപ്പ്

കോട്ടയം: മദ്യപിച്ച് അമിതവേഗത്തിൽ വാഹനമോടിച്ച് അപകടമുണ്ടാക്കിയ സംഭവത്തിൽ സീരിയൽ നടൻ സിദ്ധാർത്ഥ് പ്രഭുവിന്റെ ലൈസൻസ് റദ്ദാക്കാൻ നടപടി. ഇത് സംബന്ധിച്ച് ചിങ്ങവനം പോലീസ് ഇന്ന് മോട്ടോർ വാഹന വകുപ്പിന് റിപ്പോർട്ട് നൽകും. ഇന്നലെ അറസ്റ്റ് രേഖപ്പെടുത്തിയ ശേഷം ഇയാളെ സ്റ്റേഷൻ ജാമ്യത്തിൽ വിട്ടയച്ചിരുന്നു. ഇതിന് പിന്നാലെയാണ് ഡ്രൈവിംഗ് ലൈസൻസ് സസ്പെൻഡ് ചെയ്യുന്നതടക്കമുള്ള കർശന നടപടികളിലേക്ക് പോലീസ് നീങ്ങുന്നത്.

സിദ്ധാർത്ഥ് ഓടിച്ചിരുന്ന കാറിടിച്ച് ഒരു ലോട്ടറി വിൽപ്പനക്കാരാണ് പരിക്കേറ്റത്. ഇദ്ദേഹം നിലവിൽ ആശുപത്രിയിൽ ചികിത്സയിലാണ്. അപകടത്തിന് പിന്നാലെ ചോദ്യം ചെയ്ത നാട്ടുകാരോടും തടയാൻ ശ്രമിച്ച പോലീസുകാരോടും സിദ്ധാർത്ഥ് മോശമായി പെരുമാറുകയും ആക്രമിക്കാൻ മുതിരുകയും ചെയ്തു. ഒടുവിൽ പോലീസ് ബലം പ്രയോഗിച്ചാണ് ഇയാളെ കസ്റ്റഡിയിലെടുത്തത്. വൈദ്യപരിശോധനയിൽ താരം മദ്യപിച്ചിരുന്നതായി സ്ഥിരീകരിച്ചു.

മഴവിൽ മനോരമയിലെ ‘തട്ടീം മുട്ടീം’ എന്ന പരമ്പരയിലൂടെ ബാലതാരമായി എത്തി പ്രേക്ഷകമനം കവർന്ന താരമാണ് സിദ്ധാർത്ഥ് പ്രഭു. മഞ്ജു പിള്ളയുടെ മകനായി വർഷങ്ങളോളം മിനിസ്‌ക്രീനിൽ നിറഞ്ഞ അദ്ദേഹം ഏതാനും സിനിമകളിലും അഭിനയിച്ചു. നിലവിൽ ‘ഉപ്പും മുളകും’ എന്ന ജനപ്രിയ പരമ്പരയിൽ ലച്ചുവിന്റെ ഭർത്താവായി ശ്രദ്ധേയമായ വേഷം ചെയ്തുവരികയായിരുന്നു താരം.