സാർ, ആ റിപ്പോർട്ട് ഒന്ന് പുറത്തുവിടൂ! മുഖ്യമന്ത്രിയെ പരിഹസിച്ച് ദീപിക മുഖപത്രം; ക്രൈസ്തവരെ വിഡ്ഢികളാക്കരുതെന്ന് മുന്നറിയിപ്പ്

മുഖ്യമന്ത്രി പിണറായി വിജയന്റെ ഫേസ്ബുക്ക് കുറിപ്പിനും വാർത്താസമ്മേളനത്തിനുമെതിരെ അതിരൂക്ഷമായ വിമർശനവുമായി കത്തോലിക്കാ സഭയുടെ മുഖപത്രമായ ‘ദീപിക’. ക്രൈസ്തവ ന്യൂനപക്ഷങ്ങളെ വിഡ്ഢികളാക്കുന്ന സമീപനമാണ് സർക്കാർ സ്വീകരിക്കുന്നതെന്ന് ദീപികയുടെ മുഖപ്രസംഗം കുറ്റപ്പെടുത്തുന്നു. ജസ്റ്റിസ് ജെ.ബി. കോശി കമ്മീഷൻ റിപ്പോർട്ടുമായി ബന്ധപ്പെട്ട് മുഖ്യമന്ത്രി നൽകിയ വിശദീകരണങ്ങളാണ് സഭയെ പ്രകോപിപ്പിച്ചിരിക്കുന്നത്.

റിപ്പോർട്ട് പുറത്തുവിടാത്തത് എന്തുകൊണ്ട്?

റിപ്പോർട്ട് സമർപ്പിച്ച് രണ്ടര വർഷമായിട്ടും അത് പുറത്തുവിടാൻ സർക്കാർ തയ്യാറായിട്ടില്ല. നടപ്പാക്കിയെന്ന് പറയുന്ന 220 ശുപാർശകൾ ഏതൊക്കെയാണെന്ന് ആർക്കും അറിയില്ല. നിഗൂഢമായി നടപ്പാക്കിയ ഈ ആനുകൂല്യങ്ങൾ കണ്ടെത്താൻ ക്രൈസ്തവർക്ക് കഴിഞ്ഞിട്ടില്ലെന്ന് ദീപിക പരിഹസിക്കുന്നു.

തിരഞ്ഞെടുപ്പ് കണ്ണ്

തിരഞ്ഞെടുപ്പ് അടുത്തപ്പോഴാണ് റിപ്പോർട്ടിലെ ഭൂരിഭാഗം കാര്യങ്ങളും നടപ്പാക്കിയെന്ന അവകാശവാദവുമായി മുഖ്യമന്ത്രി രംഗത്തെത്തിയത്. ഇത് സമുദായത്തെ കബളിപ്പിക്കാനുള്ള നീക്കമാണെന്ന് മുഖപ്രസംഗം ആരോപിക്കുന്നു.

4.87 ലക്ഷം പരാതികൾ വിശകലനം ചെയ്ത് തയ്യാറാക്കിയ ഗൗരവകരമായ റിപ്പോർട്ടിനോട് സർക്കാർ ലാഘവബുദ്ധിയോടെയാണ് പെരുമാറുന്നത്. മൂന്നംഗ സമിതിയെ വെച്ചും മറ്റും സമയം വൈകിപ്പിക്കാനാണ് ശ്രമം നടന്നത്.

പശ്ചാത്തലം

2020 നവംബറിലാണ് ക്രൈസ്തവരുടെ വിദ്യാഭ്യാസ-സാമ്പത്തിക പിന്നാക്കാവസ്ഥ പഠിക്കാൻ ജെ.ബി. കോശി കമ്മീഷനെ ഒന്നാം പിണറായി സർക്കാർ നിയോഗിച്ചത്. 2023 മെയിൽ കമ്മീഷൻ റിപ്പോർട്ട് സമർപ്പിച്ചു. ആകെയുള്ള 328 ശുപാർശകളിൽ 220 എണ്ണം നടപ്പാക്കിയെന്നും ബാക്കിയുള്ളവയ്ക്കായി ഫെബ്രുവരി ആറിന് സംഘടനകളുടെ യോഗം വിളിക്കുമെന്നുമാണ് മുഖ്യമന്ത്രിയുടെ വിശദീകരണം. എന്നാൽ, നടപ്പാക്കിയവയുടെ യാതൊരു ലക്ഷണവും എങ്ങും കാണാനില്ലെന്ന് സഭ ഉറപ്പിച്ചു പറയുന്നു.