പത്ത് കഴിഞ്ഞവർക്ക് ഇന്ത്യൻ ആർമിയിൽ അവസരം

 

ഇന്ത്യൻ ആർമിയിലെ ഡയറക്ടറേറ്റ് ജനറൽ ഓഫ് ഇലക്ട്രോണിക്സ് ആൻഡ് മെക്കാനിക്കൽ എൻജിനീയേഴ്‌സിൽ (DG EME) വിവിധ തസ്തികകളിലായി പുതിയ നിയമന വിജ്ഞാപനം പുറത്തിറങ്ങി. ടെലികോം മെക്കാനിക്, ആർമമെന്റ് മെക്കാനിക്, മൾട്ടി ടാസ്‌കിങ് സ്റ്റാഫ് (MTS) എന്നീ വിഭാഗങ്ങളിലായി ആകെ 7 ഒഴിവുകളാണുള്ളത്. പത്താം ക്ലാസ്, പ്ലസ് ടു, ഐടിഐ യോഗ്യതയുള്ളവർക്കുമാണ് ഈ അവസരം പ്രയോജനപ്പെടുത്താവുന്നത്. യോഗ്യരായ ഉദ്യോഗാർത്ഥികൾക്ക് ജനുവരി 23-നകം അപേക്ഷകൾ സമർപ്പിക്കാവുന്നതാണ്.

മെക്കാനിക് തസ്തികകളിലേക്ക് അപേക്ഷിക്കുന്നവർ പ്ലസ് ടുവിനൊപ്പം ബന്ധപ്പെട്ട ട്രേഡിൽ ഐടിഐ പൂർത്തിയാക്കിയിരിക്കണം. മൾട്ടി ടാസ്‌കിങ് സ്റ്റാഫ് തസ്തികയ്ക്ക് പത്താം ക്ലാസ് വിജയവും ബന്ധപ്പെട്ട മേഖലയിൽ ഒരു വർഷത്തെ പ്രവൃത്തിപരിചയവുമാണ് നിശ്ചയിച്ചിട്ടുള്ള യോഗ്യത. അപേക്ഷകർ 18-നും 25-നും ഇടയിൽ പ്രായമുള്ളവരായിരിക്കണം. എങ്കിലും, സർക്കാർ മാനദണ്ഡങ്ങൾ അനുസരിച്ചുള്ള പ്രായപരിധി ഇളവുകൾ സംവരണ വിഭാഗത്തിൽപ്പെട്ടവർക്ക് ലഭിക്കുന്നതാണ്.

എഴുത്തുപരീക്ഷയുടെയും സ്കിൽ ടെസ്റ്റിന്റെയും അടിസ്ഥാനത്തിലാണ് ഉദ്യോഗാർത്ഥികളെ തിരഞ്ഞെടുക്കുന്നത്. ആകെ 150 മാർക്കിനുള്ള പരീക്ഷയ്ക്ക് രണ്ട് മണിക്കൂർ സമയമാണ് അനുവദിച്ചിരിക്കുന്നത്. എഴുത്തുപരീക്ഷയിൽ നെഗറ്റീവ് മാർക്കിംഗ് ഉണ്ടായിരിക്കും എന്നത് ഉദ്യോഗാർത്ഥികൾ പ്രത്യേകം ശ്രദ്ധിക്കണം. ഇതിൽ വിജയിക്കുന്നവരെ സ്കിൽ ടെസ്റ്റിന് ക്ഷണിക്കുകയും തുടർന്ന് അന്തിമ റാങ്ക് പട്ടിക പ്രസിദ്ധീകരിക്കുകയും ചെയ്യും. കൂടുതൽ വിവരങ്ങൾക്കും അപേക്ഷാ ഫോമിനുമായി ഇന്ത്യൻ ആർമിയുടെ ഔദ്യോഗിക വെബ്സൈറ്റ് സന്ദർശിക്കുക. https://indianarmy.nic.in/