ചരിത്രത്തിൽ ആദ്യം! ‘സംസ്ഥാനത്ത് ഇന്ന് 3.15 ലക്ഷം കുട്ടികൾ പ്ലസ് വൺ ക്ലാസുകളിലെത്തി’; വി ശിവൻകുട്ടി

 സംസ്ഥാനത്ത് ഇന്ന് 3,15,986 പ്ലസ് വൺ വിദ്യാർഥികൾ ക്ലാസ് മുറികളിലെത്തിയെന്നും ചരിത്രത്തില്‍ ആദ്യമയാണ് ഇത്രയും കുട്ടികള്‍ പ്രവേശനം നേടുന്നതെന്നും മന്ത്രി വി ശിവൻകുട്ടി. ബാക്കിയുള്ള അലോട്ട്മെന്റ് എത്രയും പെട്ടെന്ന് പൂര്‍ത്തിയാകുമെന്നും അടുത്ത വര്‍ഷം ഹയര്‍ സെക്കന്‍ഡറിയില്‍ പുതുക്കിയ പാഠപുസ്തകം കൊണ്ടുവരുമെന്നും മന്ത്രി പറഞ്ഞു.

വിദ്യാര്‍ഥികള്‍ക്ക് പുറമെ ‘കൂടെയുണ്ട് കരുത്തേകാന്‍’ എന്ന പദ്ധതിയിലൂടെ രക്ഷിതാക്കള്‍ക്കും പഠനം നൽകുന്ന സംവിധാനം ഈ വർഷം മുതലുണ്ടാകും. വെല്ലുവിളികളെ അതിജീവിക്കാന്‍ പ്രാപ്തമാക്കുക എന്ന ലക്ഷ്യത്തോടെ ‘വരവേല്‍പ്പ്’ പദ്ധതിയുമുണ്ടാകും. ദൗത്യം വിജയിപ്പിക്കാന്‍ കുട്ടികളും അധ്യാപകരും രക്ഷിതാക്കളും ഒന്നിച്ചു നില്‍ക്കണം.

സാമൂഹികമായും വൈകാരികമായും ബുദ്ധിപരമായും വളര്‍ത്തുന്ന ഇടംകൂടിയാകണം സ്‌കൂള്‍. കൂടെയുണ്ട് കരുത്തേകാന്‍ പദ്ധതി വിദ്യാഭ്യാസ ചരിത്രത്തിലെ നാഴികക്കല്ലായി മാറും. അടുത്തവര്‍ഷം മുതല്‍ വിപുലമായ പ്രവേശനോത്സവമുണ്ടാകുമെന്നും മന്ത്രി വി ശിവൻകുട്ടി അറിയിച്ചു.