ജിമെയിലിൽ ഇനി 15 ജിബി സൗജന്യ സ്റ്റോറേജ് ലഭിച്ചേക്കില്ല; പുതിയ നീക്കവുമായി ഗൂഗിൾ

ഒരു പുതിയ ജിമെയിൽ അക്കൗണ്ട് തുറക്കുമ്പോൾ ഗൂഗിൾ ഡ്രൈവ്, ഗൂഗിൾ ഫോട്ടോസ്, ജിമെയിൽ എന്നിവയ്ക്കായി ആകെ 15 ജിബി ക്ലൗഡ് സ്റ്റോറേജ് സൗജന്യമായി ലഭിക്കുന്ന രീതിയാണ് നമ്മൾ കണ്ടിട്ടുള്ളത്. എന്നാൽ ഇനി മുതൽ പുതിയ അക്കൗണ്ട് എടുക്കുന്നവർക്ക് ഈ 15 ജിബി സ്റ്റോറേജ് നേരിട്ട് ലഭിച്ചേക്കില്ല എന്ന സൂചനകളാണ് ഇപ്പോൾ പുറത്തുവരുന്നത്. തങ്ങളുടെ സൗജന്യ സ്റ്റോറേജ് നയത്തിൽ ഗൂഗിൾ ചില മാറ്റങ്ങൾ പരീക്ഷിക്കുന്നതായി റിപ്പോർട്ടുകൾ വ്യക്തമാക്കുന്നു.

പുതിയ മാറ്റം അനുസരിച്ച്, പുതുതായി നിർമിക്കുന്ന അക്കൗണ്ടുകൾക്ക് തുടക്കത്തിൽ 5 ജിബി സൗജന്യ സ്റ്റോറേജ് മാത്രമായിരിക്കും ലഭിക്കുക. ബാക്കി 10 ജിബി കൂടി അൺലോക്ക് ചെയ്ത് ആകെ 15 ജിബി സ്റ്റോറേജ് സ്വന്തമാക്കണമെങ്കിൽ ഉപയോക്താക്കൾ തങ്ങളുടെ ഫോൺ നമ്പർ അക്കൗണ്ടുമായി ബന്ധിപ്പിക്കേണ്ടി വരും. നിലവിൽ അക്കൗണ്ട് നിർമാണ വേളയിൽ ഉപയോക്താക്കൾക്ക് മുന്നിൽ ഗൂഗിൾ രണ്ട് ഓപ്ഷനുകളാണ് വെക്കുന്നത്; ഒന്നുകിൽ 5 ജിബി സ്റ്റോറേജുമായി മുന്നോട്ട് പോവുക, അല്ലെങ്കിൽ ഫോൺ നമ്പർ നൽകി പൂർണമായ 15 ജിബി സ്റ്റോറേജ് സ്വന്തമാക്കുക. ചില ആഫ്രിക്കൻ രാജ്യങ്ങളിലെ ഉപയോക്താക്കളാണ് അക്കൗണ്ട് സെറ്റപ്പ് ചെയ്യുന്നതിനിടയിൽ ഇത്തരമൊരു മാറ്റം ആദ്യമായി ശ്രദ്ധയിൽപ്പെടുത്തിയത്.

എന്തുകൊണ്ടാണ് ഗൂഗിൾ ഈ മാറ്റം കൊണ്ടുവരുന്നത്?

ഗൂഗിൾ പ്ലാറ്റ്‌ഫോമുകളിലെ സുരക്ഷ വർധിപ്പിക്കുന്നതിനും വ്യാജ അക്കൗണ്ടുകളും സ്പാമുകളും നിയന്ത്രിക്കുന്നതിനുമാണ് കമ്പനി ഇത്തരമൊരു നീക്കം നടത്തുന്നത്. ഈ പുതിയ നയം പരീക്ഷിക്കുന്ന കാര്യം ഗൂഗിൾ വക്താവ് സ്ഥിരീകരിച്ചിട്ടുണ്ട്. തങ്ങളുടെ ഉപയോക്താക്കൾക്ക് ഉയർന്ന നിലവാരമുള്ള സ്റ്റോറേജ് സേവനം തുടർന്നും ഉറപ്പാക്കുന്നതിനൊപ്പം, അക്കൗണ്ട് സുരക്ഷയും ഡാറ്റ റിക്കവറിയും മെച്ചപ്പെടുത്താൻ ഉപയോക്താക്കളെ പ്രോത്സാഹിപ്പിക്കുകയാണ് ഈ പരീക്ഷണത്തിലൂടെ ലക്ഷ്യമിടുന്നതെന്ന് ഗൂഗിൾ വ്യക്തമാക്കി.

ഫോൺ നമ്പർ നൽകുന്നത് വഴി അക്കൗണ്ട് ഹാക്ക് ചെയ്യപ്പെടുന്നത് തടയാനും, പാസ്‌വേഡ് മറന്നുപോയാൽ അക്കൗണ്ട് വീണ്ടെടുക്കാനും എളുപ്പമാകും. കൂടാതെ, ഒരേ വ്യക്തി തന്നെ വ്യാജ വിവരങ്ങൾ നൽകി ഒന്നിലധികം ജിമെയിൽ അക്കൗണ്ടുകൾ നിർമിച്ച് സൗജന്യ സ്റ്റോറേജ് ദുരുപയോഗം ചെയ്യുന്നത് തടയാനും ഫോൺ നമ്പർ വെരിഫിക്കേഷനിലൂടെ സാധിക്കും.

നിലവിലുള്ള ഉപയോക്താക്കളെ ബാധിക്കുമോ?

നിലവിൽ ജിമെയിൽ അക്കൗണ്ട് ഉള്ളവരെയും 15 ജിബി സൗജന്യ സ്റ്റോറേജ് ഉപയോഗിക്കുന്നവരെയും ഈ മാറ്റം ബാധിക്കില്ല. പുതിയ അക്കൗണ്ട് എടുക്കുന്നവർക്ക് മാത്രമാണ് ഈ നിയമം ബാധകമാവുക. നിലവിൽ തിരഞ്ഞെടുത്ത ചില രാജ്യങ്ങളിൽ മാത്രമാണ് ഗൂഗിൾ ഈ പുതിയ സ്റ്റോറേജ് പോളിസി പരീക്ഷിക്കുന്നത്. ഇത് താൽക്കാലികമായ ഒരു പരീക്ഷണമാണോ അതോ ആഗോളതലത്തിൽ എല്ലാ ഉപയോക്താക്കൾക്കുമായി വ്യാപിപ്പിക്കുമോ എന്ന കാര്യത്തിൽ കമ്പനി വ്യക്തത വരുത്തിയിട്ടില്ല. എങ്കിലും, ഭാവിയിൽ സുരക്ഷ മുൻനിർത്തി പുതിയ അക്കൗണ്ടുകൾക്ക് ഫോൺ നമ്പർ നിർബന്ധമാക്കാനുള്ള സാധ്യത വളരെ കൂടുതലാണ്.