കുതിച്ച് പാഞ്ഞ് സ്വര്‍ണവില; ഒറ്റയടിക്ക് കൂടിയത് പതിനായിരത്തിലധികം രൂപ

സംസ്ഥാനത്ത് സ്വർണവിലയിൽ മുമ്പെങ്ങുമില്ലാത്ത വിധത്തിലുള്ള വൻ വർധനവ് രേഖപ്പെടുത്തി. ഒറ്റയടിക്ക് പവന് 10,200 രൂപ വർധിച്ചതോടെ ഒരു പവൻ സ്വർണത്തിന്റെ വില 1,23,220 രൂപ എന്ന റെക്കോർഡ് നിലവാരത്തിലെത്തി. ഗ്രാമിന് 1275 രൂപയുടെ വർധനവാണ് 22 കാരറ്റ് സ്വർണത്തിന് ഉണ്ടായിരിക്കുന്നത്. മെയ് 5-ന് രേഖപ്പെടുത്തിയ 1,09,400 രൂപയായിരുന്നു ഈ മാസത്തെ ഏറ്റവും കുറഞ്ഞ നിരക്ക്. സ്വർണത്തിന് പിന്നാലെ വെള്ളി വിലയിലും വലിയ കുതിച്ചുചാട്ടമാണ് ഉണ്ടായത്. ഒരു ഗ്രാം വെള്ളിക്ക് നിലവിൽ 320 രൂപയാണ് വിപണി വില.

കേന്ദ്ര സർക്കാർ സ്വർണത്തിന്റെ ഇറക്കുമതി തീരുവ 15% ആയി ഉയർത്തിയതാണ് ഈ വൻ വിലക്കയറ്റത്തിന് പ്രധാന കാരണം. ഇന്നലെ അർധരാത്രി മുതലാണ് പരിഷ്കരിച്ച തീരുവ പ്രാബല്യത്തിൽ വന്നത്. ഇതിന്റെ നേരിട്ടുള്ള പ്രതിഫലനമാണ് ഇന്നത്തെ സ്വർണ വിപണിയിൽ കണ്ടത്. രാജ്യത്ത് നിന്നുള്ള വിദേശനാണ്യത്തിന്റെ ഒഴുക്ക് തടയുക എന്ന ലക്ഷ്യത്തോടെയാണ് കേന്ദ്ര സർക്കാർ ഈ നടപടി സ്വീകരിച്ചിരിക്കുന്നത്.