ന്യൂഡൽഹി: സിബിഎസ്ഇയുടെ ഓൺ-സ്ക്രീൻ മാർക്കിങ് (OSM) പോർട്ടലിലെ സുരക്ഷാ പിഴവുകൾ കണ്ടെത്തിയ 19കാരൻ നിസർഗ അധികാരിക്ക് ഐഐടി കാണ്പൂര്. സൈബർ സുരക്ഷാ-സൈബർ പ്രതിരോധ ഗവേഷണ കേന്ദ്രമായ C3iHub-ൽ ഒസിന്റ് ആൻഡ് ത്രെട്ട് ഇന്റലിജൻസ് എഞ്ചിനീയറായാണ് നിയമനം.
വളരെ ചെറിയ പ്രായത്തിൽ തന്നെ ശ്രദ്ധേയമായ സാങ്കേതിക കഴിവുകൾ തെളിയിച്ച പ്രതിഭാശാലിയായ ഒരു യുവ എഞ്ചിനീയറാണ് നിസർഗ അധികാരി എന്നാണ് ഐഐടി കാൺപൂർ ഡയറക്ടർ പ്രൊഫ. മണീന്ദ്ര അഗർവാൾ പറഞ്ഞത്. മികച്ച സാധ്യതകളുണ്ടെന്ന് തങ്ങൾ വിശ്വസിക്കുന്നു. ഐഐടി കാൺപൂരിലെ ജോലി അദ്ദേഹത്തിന്റെ കഴിവുകൾ കൂടുതൽ വികസിപ്പിക്കാൻ സഹായിക്കുന്നതോടൊപ്പം, C3iHub-ലെ സൈബർ സുരക്ഷാ, ത്രെട്ട് ഇന്റലിജൻസ് പദ്ധതികൾക്ക് മികച്ച സംഭാവനകൾ നൽകാനും അവസരമൊരുക്കും. അദ്ദേഹത്തിന്റെ മുന്നോട്ടുള്ള യാത്രയ്ക്ക് എല്ലാവിധ ആശംസകളും നേരുന്നുവെന്നും അദ്ദേഹം പറഞ്ഞു.
രാജ്യത്തുടനീളമുള്ള സിബിഎസ്ഇ അഫിലിയേറ്റഡ് സ്കൂളുകൾ വിദ്യാർഥികളുടെ പരീക്ഷാ മാർക്കുകൾ അപ്ലോഡ് ചെയ്യാനും കൈകാര്യം ചെയ്യാനും ഉപയോഗിക്കുന്ന ഒരു നിർണായക ഡിജിറ്റൽ പ്ലാറ്റ്ഫോമാണ് OSM പോർട്ടൽ. ബോർഡ് പരീക്ഷകളുടെ ഫലപ്രഖ്യാപനത്തിനും മൂല്യനിർണയത്തിനുമായി സ്കൂളുകൾക്ക് ഓൺലൈനായി മാർക്കുകൾ സമർപ്പിക്കാൻ സഹായിക്കുന്ന ഈ സംവിധാനം പരീക്ഷാ പ്രക്രിയയിൽ വളരെ പ്രധാനപ്പെട്ട ഒരു പങ്കാണ് വഹിക്കുന്നത്.
വ്യക്തിഗത വിവരങ്ങൾ ദുരുപയോഗം ചെയ്യുന്നവർക്ക് വിദ്യാർഥികളുടെയും സ്കൂളുകളുടെയും അതീവ രഹസ്യവിവരങ്ങൾ ചോർത്താൻ സാധിക്കുന്ന തരത്തിലുള്ള നിരവധി സുരക്ഷാ വീഴ്ചകൾ നിസർഗ നേരത്തെ ഈ പോർട്ടലിൽ കണ്ടെത്തിയിരുന്നു. റിപ്പോർട്ടുകൾ പ്രകാരം, ആക്സസ് കൺട്രോളുകളിലും ഡാറ്റാ സുരക്ഷയിലുമുള്ള പോരായ്മകൾ ഇതിൽ ഉൾപ്പെടുന്നു. പ്ലാറ്റ്ഫോം കൈകാര്യം ചെയ്യുന്ന വിവരങ്ങളുടെ സുരക്ഷിതത്വത്തെക്കുറിച്ച് വലിയ ആശങ്കകളാണ് ഇത് ഉയർത്തിയത്.
0 Comments