ഹോർമുസിൽ സ്ഥിതി സാധാരണ നിലയിലെന്ന് ട്രംപ്; ഇറാനെതിരായ യുദ്ധം അവസാനിപ്പിക്കാൻ യുഎസ് സെനറ്റിൽ പ്രമേയം

 വാഷിംഗ്‌ടൺ: ഹോർമുസ് കടലിടുക്കിൽ നിലവിൽ സ്ഥിതിഗതികൾ സാധാരണ നിലയിലായതായി യുഎസ് പ്രസിഡന്റ് ഡൊണാൾഡ് ട്രംപ്. കഴിഞ്ഞ ദിവസം മാത്രം 19 ദശലക്ഷം ബാരൽ എണ്ണയുമായി പോയ കപ്പലുകൾ സുരക്ഷിതമായി ഹോർമുസ് കടന്നുപോയതായും അദ്ദേഹം അവകാശപ്പെട്ടു. സ്വിറ്റ്സർലൻഡ് ധാരണയുമായി ബന്ധപ്പെട്ട് അമേരിക്കയും ഇറാനും തമ്മിൽ വിരുദ്ധ പ്രസ്താവനകൾ തുടരുന്നതിനിടയിലാണ് ട്രംപിന്റെ ഈ പ്രതികരണം പുറത്തുവരുന്നത്. അതേസമയം, ഇറാനെതിരായ സൈനിക നീക്കങ്ങളും യുദ്ധവും അവസാനിപ്പിക്കണമെന്ന് ആവശ്യപ്പെട്ടുകൊണ്ടുള്ള പ്രമേയം യുഎസ് സെനറ്റിൽ അവതരിപ്പിച്ചു എന്നത് ഈ മേഖലയിലെ യുഎസ് നിലപാടുകളിൽ നിർണായക മാറ്റമായി കാണാം.

ആണവ പരിശോധകർക്ക് രാജ്യത്ത് അനുമതി നൽകുന്ന കാര്യത്തിൽ ഇതുവരെ അന്തിമ തീരുമാനമെടുത്തിട്ടില്ലെന്ന ഇറാന്റെ ഔദ്യോഗിക വാദത്തെ ഡൊണാൾഡ് ട്രംപ് പൂർണമായും തള്ളി. ഉചിതമായ സമയത്ത് തന്നെ അന്താരാഷ്ട്ര ആണവ പരിശോധകർ ഇറാനിൽ എത്തുമെന്നാണ് അമേരിക്കൻ പ്രസിഡന്റ് വ്യക്തമാക്കുന്നത്. എന്നാൽ, തങ്ങളുടെ ബാലിസ്റ്റിക് മിസൈൽ പദ്ധതികളെക്കുറിച്ച് നിലവിൽ യാതൊരുവിധ ചർച്ചകളും നടന്നിട്ടില്ലെന്ന് ഇറാനും പാകിസ്താനും ഒരുപോലെ വ്യക്തമാക്കിയിട്ടുണ്ട്.

മധ്യപൂർവേഷ്യയിലെ മറ്റ് പ്രാദേശിക തർക്കങ്ങളും ഇതോടൊപ്പം ശക്തമായി നിലനിൽക്കുന്നുണ്ട്. ലെബനാന്റെ ഒരിഞ്ച് ഭൂമി പോലും കൈയേറാൻ ഇസ്രായേലിനെ അനുവദിക്കില്ലെന്ന് ഹിസ്ബുല്ല കടുത്ത മുന്നറിയിപ്പ് നൽകിയിട്ടുണ്ട്. എന്നാൽ ഹോർമുസിലെ തർക്കങ്ങൾക്ക് താല്കാലിക ശമനമുണ്ടായതും എണ്ണക്കടത്ത് പുനരാരംഭിച്ചതും ആഗോള വിപണിയിൽ വലിയ ആശ്വാസമാണ് നൽകിയത്. വിതരണം സുഗമമായതോടെ രാജ്യാന്തര വിപണിയിൽ എണ്ണവില ബാരലിന് 77 ഡോളറിലേക്ക് ഇടിഞ്ഞിരിക്കുകയാണ്.