വൈദ്യുതി പ്രതിസന്ധി; ജൂലൈയിൽ 180 മെഗാവാട്ട് വൈദ്യുതി ഉയർന്ന വിലക്ക് വാങ്ങാൻ കെഎസ്ഇബി

 

തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധിയിൽ ആശ്വാസനീക്കവുമായി കെഎസ്ഇബി. ജൂലൈയിൽ 180 മെഗാവാട്ട് വൈദ്യുതി ഉയർന്ന വിലയ്ക്ക് വാങ്ങാൻ കെഎസ്ഇബി തീരുമാനിച്ചു. റെഗുലേറ്ററി കമ്മീഷൻ ഇതിന് അനുമതി നൽകിയതിന് പിന്നാലെയാണ് ബോർഡിന്റെ അടിയന്തര നടപടി.

ഇതിന് പുറമെ, 200 മെഗാവാട്ട് വൈദ്യുതി കൂടി വാങ്ങാനും കെഎസ്ഇബി ലക്ഷ്യമിടുന്നുണ്ട്. ഇതുവഴി യൂണിറ്റിന് 6 രൂപയിൽ താഴെ നിരക്കിൽ വൈദ്യുതി ലഭ്യമാകുമെന്നാണ് ബോർഡിന്‍റെ വിലയിരുത്തൽ. കെഎസ്ഇബി കോർ കമ്മിറ്റിയിൽ ഇത് സംബന്ധിച്ച ചർച്ചകൾ പൂർത്തിയായി. തീരുമാനങ്ങൾ സർക്കാരിനെ അറിയിച്ച ശേഷം, ഔദ്യോഗികമായ അനുമതിക്കായി റെഗുലേറ്ററി കമ്മീഷന് അപേക്ഷ സമർപ്പിക്കുമെന്ന് അധികൃതർ അറിയിച്ചു.

സെപ്റ്റംബർ ഒഴികെ, ജൂലൈ മുതൽ ഡിസംബർ വരെയുള്ള കാലയളവിലേക്കാണ് വൈദ്യുതി വാങ്ങാൻ കെഎസ്ഇബിക്ക് റെഗുലേറ്ററി കമ്മീഷൻ നേരത്തെ അനുമതി നൽകിയത്. ജൂലൈ മുതൽ ഡിസംബർ വരെ 600 മുതൽ 1000 മെഗാവാട്ട് വരെ വൈദ്യുതിയുടെ കുറവുണ്ടാകുമെന്ന് കെഎസ്ഇബി കമ്മീഷനെ അറിയിച്ചിരുന്നു. ഇതിന്റെ അടിസ്ഥാനത്തിലാണ് നടപടി.