ശിവപ്രിയയുടെ മരണം; വിദഗ്ധ സമിതി റിപ്പോർട്ട് ഇന്ന് സമർപ്പിക്കും

തിരുവനന്തപുരത്ത് അണുബാധയെ തുടർന്ന് മരിച്ച ശിവപ്രിയക്ക് അണുബാധയുണ്ടായത് ആശുപത്രിയിൽ നിന്ന് അല്ലെന്നാണ് പ്രാഥമികമായി നടത്തിയ പരിശോധനകളിലെ നിഗമനം. ലേബർ റൂമിലും പ്രസവാനന്തര ശുശ്രൂഷ നൽകുന്ന ഇടങ്ങളിലും നടത്തിയ പരിശോധനയിൽ അണുബാധ ഉണ്ടാക്കുന്ന ബാക്ടീരിയകളുടെ സാന്നിധ്യം കണ്ടെത്താൻ കഴിഞ്ഞില്ല. ഒരാഴ്ച മുമ്പ് നടത്തിയ പരിശോധനയിലാണ് ഈ കണ്ടെത്തൽ.

ശിവപ്രിയയുടെ മരണവുമായി ബന്ധപ്പെട്ട അന്വേഷണ റിപ്പോർട്ട് വിദഗ്ധ സമിതി ഇന്ന് സമർപ്പിക്കും. കഴിഞ്ഞ ദിവസങ്ങളിൽ ശിവപ്രിയയുടെ ബന്ധുക്കളുടെയും ചികിത്സിച്ച ഡോക്ടർമാരുടെയും മൊഴികൾ രേഖപ്പെടുത്തിയിരുന്നു. അതേസമയം, റിപ്പോർട്ട് വന്നശേഷം തുടർ നടപടികളെക്കുറിച്ച് ആലോചിക്കുമെന്ന് ശിവപ്രിയയുടെ ഭർത്താവ് മനു പ്രതികരിച്ചു.

ശിവപ്രിയയുടെ മരണത്തിലെ അന്വേഷണ റിപ്പോർട്ടിനെക്കുറിച്ച് ഭർത്താവ് മനു കടുത്ത അതൃപ്തി രേഖപ്പെടുത്തി. “അവസാനം ഡോക്ടർമാർക്ക് അനുകൂലമായാണ് എല്ലാ റിപ്പോർട്ടുകളും വരാറുള്ളത്,” അദ്ദേഹം പറഞ്ഞു. ആശുപത്രിയിൽ എത്തിച്ചപ്പോൾ തന്നെ “വീട്ടിൽ നിന്ന് അണുബാധയുണ്ടായി” എന്നാണ് ഡോക്ടർമാർ പറഞ്ഞതെന്നും, മരണശേഷവും അത് തന്നെ ആവർത്തിച്ചെന്നും ഇനിയും അതുതന്നെ പറയാനാണ് സാധ്യതയെന്നും മനു ആരോപിച്ചു. “അന്വേഷണം നടത്തുന്നത് ഡോക്ടർമാർ തന്നെയല്ലേ. അവർ മറ്റ് ഡോക്ടർമാർക്ക് അനുകൂലമായല്ലേ റിപ്പോർട്ട് സമർപ്പിക്കൂ,” അദ്ദേഹം ചോദിച്ചു. കൂടാതെ, “കുഞ്ഞിൻ്റെ ആരോഗ്യനില പോലും ഇതുവരെയും ആരും അന്വേഷിച്ചിട്ടില്ല” എന്ന കടുത്ത വിമർശനവും അദ്ദേഹം ഉന്നയിച്ചു.