ഇന്ത്യക്ക് മുകളിൽ കാലവർഷമേഘങ്ങൾ വൻതോതിൽ കുറഞ്ഞത് വ്യക്തമാക്കി സാറ്റലൈറ്റ് ചിത്രങ്ങൾ

 

ന്യൂഡൽഹി: ഇന്ത്യയിലുടനീളം കാലവർഷമേഘങ്ങളുടെ സാന്നിധ്യം വിചിത്രമായ രീതിയിൽ കുറഞ്ഞതായി വ്യക്തമാക്കുന്ന സാറ്റലൈറ്റ് ചിത്രങ്ങൾ പുറത്ത്. തെക്കുപടിഞ്ഞാറൻ മൺസൂൺ രാജ്യത്തിന്റെ ഭൂരിഭാഗം പ്രദേശങ്ങളിലും ഔദ്യോഗികമായി എത്തിയെങ്കിലും, ഇന്ത്യയുടെ വലിയൊരു ഭാഗത്തും ആകാശം അസാധാരണമാംവിധം മേഘങ്ങളില്ലാതെ തുടരുകയാണ്. മധ്യ, പടിഞ്ഞാറൻ, വടക്കുപടിഞ്ഞാറൻ ഇന്ത്യയിൽ മഴ നൽകുന്ന മേഘങ്ങളുടെ പ്രകടമായ കുറവാണ് ഏറ്റവും പുതിയ സാറ്റലൈറ്റ് ചിത്രങ്ങൾ കാണിക്കുന്നത്. കാലവർഷത്തിന്റെ മന്ദഗതിയിലുള്ള പുരോഗതി കാരണം ജൂൺ നാലിനും ജൂൺ 26നും ഇടയിൽ രാജ്യത്ത് 45% മഴയുടെ കുറവുണ്ടായതായി ഇന്ത്യൻ കാലാവസ്ഥാ വകുപ്പ് വ്യക്തമാക്കുന്നു.

വ്യാഴാഴ്ച രാവിലെ എടുത്ത ഏറ്റവും പുതിയ ഇൻസാറ്റ്-3ഡിആർ ഇൻഫ്രാറെഡ് സാറ്റലൈറ്റ് ചിത്രം ജൂൺ അവസാന വാരത്തിൽ സാധാരണയായി കാണാത്ത ഒരു ചിത്രമാണ് നൽകുന്നത്. വടക്കുകിഴക്കൻ സംസ്ഥാനങ്ങൾ, ബംഗാൾ ഉൾക്കടലിന്റെ വടക്കൻ ഭാഗങ്ങൾ, തെക്കൻ ഉപദ്വീപിന്റെ ചില ഭാഗങ്ങൾ എന്നിവിടങ്ങളിൽ കനത്ത മേഘപാളികൾ കാണാമെങ്കിലും, മഹാരാഷ്ട്ര, മധ്യപ്രദേശ്, ഗുജറാത്ത്, രാജസ്ഥാൻ, ഉത്തർപ്രദേശ്, ഡൽഹി-എൻസിആർ എന്നീ വിശാലമായ പ്രദേശങ്ങളിൽ സജീവമായ കാലവർഷത്തിന്റെ ലക്ഷണമായ കനത്ത മഴമേഘങ്ങൾ ഒട്ടുംതന്നെ കാണാനില്ല. മഴയുടെ വിതരണത്തിലും ഈ സാറ്റലൈറ്റ് നിരീക്ഷണങ്ങൾ പ്രതിഫലിക്കുന്നുണ്ട്.

ഐഎംഡിയുടെ സംസ്ഥാനം തിരിച്ചുള്ള മഴയുടെ ഭൂപടത്തിലും മധ്യ, വടക്കൻ ഇന്ത്യയിലുടനീളം മഴയുടെ വലിയ തോതിലുള്ള കുറവാണ് കാണിക്കുന്നത്. മധ്യപ്രദേശിൽ സാധാരണ ലഭിക്കേണ്ട മഴയുടെ പകുതിയോളം മാത്രമാണ് ലഭിച്ചത്. ഉത്തർപ്രദേശ്, ബിഹാർ, ഒഡീഷ, കർണാടക, തമിഴ്നാട്, കേരളം എന്നീ സംസ്ഥാനങ്ങളിലും വലിയ തോതിലുള്ള മഴക്കുറവ് രേഖപ്പെടുത്തുന്നുണ്ട്. ഈ കാലയളവിൽ സാധാരണ ലഭിക്കേണ്ടതിനേക്കാൾ 84% കുറവ് മഴ മാത്രം ലഭിച്ച ഗുജറാത്താണ് ഏറ്റവും കൂടുതൽ ബാധിക്കപ്പെട്ട സംസ്ഥാനങ്ങളിലൊന്ന്. കരയിലേക്ക് നീങ്ങുന്ന ന്യൂനമർദങ്ങൾ രൂപപ്പെടാത്തതിനാൽ അന്തരീക്ഷത്തിലെ ഈർപ്പത്തിന്റെ അളവ് പരിമിതപ്പെടുകയും, ഇത് രാജ്യത്തിന്റെ ഉൾപ്രദേശങ്ങളിൽ പരക്കെ മഴ ലഭിക്കുന്നതിനെ തടസപ്പെടുത്തുകയും ചെയ്തു. എങ്കിലും, ഈ പ്രതിസന്ധി ഉടൻ അവസാനിക്കുമെന്നാണ് കാലാവസ്ഥാ നിരീക്ഷകർ നൽകുന്ന സൂചന.

കിഴക്കൻ ഇന്ത്യൻ മഹാസമുദ്രത്തിൽ ഭൂമധ്യരേഖയ്ക്ക് വടക്കായി ഒരു വലിയ ഉഷ്ണമേഖലാ ന്യൂനമർദം നിലവിൽ രൂപപ്പെടുന്നുണ്ട്. അടുത്ത നാല് മുതൽ ഏഴ് ദിവസത്തിനുള്ളിൽ ഇത് വടക്കോട്ട് നീങ്ങി ബംഗാൾ ഉൾക്കടലിൽ പ്രവേശിക്കുമെന്നാണ് പ്രവചനം. ശക്തിപ്രാപിക്കുന്നതോടെ, ഇത് മൺസൂൺ കാറ്റിലേക്ക് വൻതോതിൽ ഉഷ്ണമേഖലാ ഈർപ്പം എത്തിക്കുകയും, ഇത് പുതിയൊരു മഴക്കാലത്തിന് ആവശ്യമായ സാഹചര്യം ഒരുക്കുകയും ചെയ്യും. ഈ ശക്തമായ ഈർപ്പത്തിന്റെ ഒഴുക്ക് ബംഗാൾ ഉൾക്കടലിൽ ഒരു മൺസൂൺ ന്യൂനമർദം രൂപപ്പെടുന്നതിന് അനുകൂലമായ സാഹചര്യമൊരുക്കുമെന്നും പ്രതീക്ഷിക്കുന്നു. അതേസമയം, പടിഞ്ഞാറൻ ഇന്ത്യയ്ക്ക് മുകളിലായി മിഡിൽ ട്രോപോസ്‌ഫെറിക് വോർട്ടെക്‌സ് രൂപപ്പെടാനുള്ള സാധ്യതയും കാണുന്നുണ്ട്.